Emîne Şenyaşar û Ferît Şenyaşar ê ke merdimê înan hetê merdimanê Wekîlê AKPyî Halîl Îbrahîm Yildizî ra kişîyayî verê Edlîyeya Riha de Nobeta Edaletî kenê. Roja 659. ya nobete de Ferît Şenyaşar ame verê edlîye la Emîne Şenyaşar seba ke derheqê ci de di tehqîqatê bînî ameyî akerdene seba îfade şîye Mudirîya Asayîşî ya Riha.

Avûkat Nîhat Şahîn zî hetê dayîke Şenyaşare de şîye asayîşî. Tehqîqatî bi bahaneya ke Emîne Şenyaşar Wekîl Yildiz û polîsan rê 'heqaret kerdo' ameyî akerdene. Reyna bi waştişê babîyê Yildizî Osman Yildiz zî tehqîqat ame akerdene.

Emîne Şanyaşar derheqê sûcdarîkerdişan de asayîş de îfade da û waşt ke wa Serdozgerîya Komare de îfadeyê ci bêro girewtene.

Bi nê wird tehqîqatan heta nika derheqê Emîne Şenyaşar de 17 tehqîqatî ameyî akerdene. Nînan ra 6 tehqîqatî bîyî sebebê dewa û hema zî nê dewayî dewam kenê.