Denîze Poyraza ke bînaya HDPyî ya Îzmîrî hetê faşîst Onur Gencerî ra amebî qetilkerdene, babîyê aye Abdullah Poyraz derheqê babete de Ajansê Mezopotamya rê roportajêk dabi. Dima nê roportajî ra derheqê babî Poyrazî de bi îdîaya 'propagandaya rêxistine' dewa amebî akerdene. Hemsereka Pêroyî ya Komeleya Heqanê Merdiman (ÎHD) Erene Keskîn vera na dewa hesabê xo yê medyaya dîjîtale de nêrazîbîyayîşê xo mojnabi. Nê nêrazîbîyayîşî ra zî derheqê Erene Keskîn de dewa ameye akerdene.

Dozgero ke derheqê babî Poyrazî de tehqîqat dîyabi destpêkerdene, dima gerreyê vilakerdişê medyaya dîjîtale yê Erene Keskîn kerdbî. Gerreyî ser o îdîaname ame amadekerdene û derheqê Keskîne de dewa ameye akerdene.

Roniştişê dewa 23yê sibate de Mehkemeya Cezaya Girane ya Îzmîrî de do bêro kerdene. Îdîaname de Keskîne bi îdîayanê 'heqaret û hedefmojnayîşî' yena sûcdarkerdene û seba aye cezaya zîndanî ya 3 mengan ra heta 5 serran yena waştene.

Keskîne derheqê dewa de hesabê xo yê medyaya dîjîtale de no mesaj da: ''Vilakerdişê mi ra Mehkemeya Cezaya Girane reyna mi rê dewa kerda a. Yew mehkemeya ke nêzanena dejê babîyêkê xemgînî rê hûrmet bikera.''