Kongreya Komelê Demokratîkî yê Kurdan ê Ewropa (KCDK-E), Têgêrayîşê Cinîyan ê Kurdan ê Ewropa (TJK-E) û Federasyonê Karkeran ê Tirkîyayîjan ê Ewropa (ATÎF) derheqê hêrişanê dewleta tirke û hêrişê Viyana de eşkerayîyêke kerde.

KCDK-E û TJK-E: ''24ê hezîrane de paytextê Viyana yê Awusturya de faşîstanê tirkan hêrişê çalakîya Paştdayîşê Cinîyan ê Ewropa-AKD kerdbi û ewro zî hêrişê winasênî vera bînayanê rêxistinan ê demokratîkan yenê kerdene. Dîktator û faşîst Erdoganî hêrişanê vera Mexmûr, Şingal û Qendîlî ra dima hêrişê Kobanê û dima zî hêrişê Silêmanî kerd û domanêko kurd qetil kerd. Erdogan verê çimanê dinya de hêriş keno la dinya pê bêvengîye nê hêrişan seyr kena.

Seba ke hêrişê vera Kobanê şermezar bikerê û hêrişê faşîstan ê tirkan ê vera demokratanê Viyana protesto bikerê ma venga roşnvîr, demokrat, şorişgêr û şarê ma danê ke verê faşîzmî bigêrê. Ma venga nînan danê ke Ewropa de tewrê çalakîyanê nê hewteyî bibê. Ma vera faşîstan cepheyê yewbîyayeyî de hêzê xo bivirazê.''

ATÎF: ''Polîtîkayê înkar û îmha yê dewleta tirke yê vera kurdan dewam kenê. Dewleta tirke Şingal, Mexmûr û Qendîlî ser o bombayî varnayî. Hêrişanê Hamburg, Nurnberg, Hannover û Viyana de girîngîya têkoşînê hemparî vejîyaye werte. Ma do tersê faşîstan bikerê zêdêr.''