Hukmatê AKP-MHPyî 2022 de qanûnê sansurî amade kerd û bi nê qanûnî vera rojnamageran tehqîqat û dewayê neweyî zêdîyayî.

Rojanê vîyarteyan de Wezîrîya Karanê Zereyî yê Tirkîya dîmenêk pare kerd ke tede aseno ke polîsê tirkî Wan de erzenê keyeyêkî ser û berê keyeyî şiknenê. Rojnameger Oktay Candemîrî rexne kerd ke bi parekerdişê nê dîmenî 'krîterê bêgunetîye yeno binpaykerdene.'

Dozgerîya Komare ya Wanî rexneyê Candemîrî ser o tehqîqat da destpêkerdene.

Candemîrî çarçewa tehqîqatî de avûkatê xo Kadîr Kutevîyî reyde qereqol de îfade da. Candemîrî vat ke dîmenî sey rojnameger û merdimêkî o nerehet kerdo û raşt nîyo ke dîmenî hetê Wezîrîya Karanê Zereyî ra bêrê weşanayene.

Îfadedayîşî ra dima Candemîr vera dîya.