Tecrîdê serê Rayberê Şarê Kurdî Abdullah Ocalanî bi granêrkerdişî dewam keno. Endamê Heyetê Rayberdişî yê Platformê Kurdanê Anatolyaya Mîyanêne (PKAN) Ali Fuat Gursel û Îdarekarê Enstituya Kurdan a Almanya Memoste Ahmet Aktaşî babete ajansê ma rê ercnaye.

Îdarekarê Enstituya Kurdan a Almanya Memoste Ahmet Aktaşî vat: “Rayber Apo têna şexsêk nîyo,  ganî sey dezgehêk bêro pênaskerdene. O, kurd û Kurdîstan bîyî yew. Dewlete zî nê zana. Şarê kurdî ganî azadîya xo azadîya ey de bivîno. Ganî her kes semedê azadîya Raybarê Şarê Kurdî bibo seferber. Eke ma sey kurdan wayîrê ey bivejîyê ma eşkenê bibê azad. Ganî her hes goreyê hêzê xo wirzo payan ser. Bi çeke, ekonomî, qelem, huner; yanî her her kes çîyo ke destê ci ra yeno ganî bikero. Ganî Rayberê şarê kurdî bibo azad. Ma azadîya Rayberîya xo wazenê la no têna pê qale nêbeno. Pê çalakîye beno. Ganî çalakîyê organîzekerdeyî bêrê kerdene. Ma sey kurdanê ke Ewropa de ciwîyenê ganî ma dewaya xo şaranê bînan rê bidê nasdayene. Eke ma pêro her ca de berpirsîyarîya xo bîyarê ca, ez eşkena vajî ke azadîya Rayberîye nêzdî ya.” 

Endamê Heyetê Rayberdişî yê PKANî Ali Fuat Gurselî zî nê vatî: “Rayberîye binê tecrîdê granî de yo. Çîyo wînayên nîno qebulkerdene. Abdullah Ocalanî têna semedê kurdan û Tirkîya nê semedê Rojhelatê Mîyanênî paradîgmaya newî înşa kerd. Seba ke vera tecrîdî destkewteyî bêrê pawitene ganî nêzrazîbîyayîşê kurdan zafêr bo. Çalakîyê ke yenê kerdene qîm nêkenê. Ganî ma vengê xo zafêr berz bikerê. Na rewşe huqûqî nîya. Xora çîyo huqûqî çîn o. Şarê ma bi serran o fedakarîye keno, ma nê zanê. Netîceya na fedakarîye de destkewteyê ma zî est ê. Şarê ma ganî vera tecrîdî û semedê pawitişê destkewteyanê xo tewirê xo zelal ramojno.”