Qasê 500 avûkatan û dezgehanê huqûqî 16ê êlule de seba azadîya Rayberê Şarê Kurdî Abdullah Ocalanî Wezîrîya Edaletî ya Tirkîya rê mektubêke şawitbî. Yewîya Avûkatanê Ewropa ya Seba Demokrasîyî û Heqanê Merdiman a Dinya (ELDH) zî nê dezgehan ra yew o.

Hemserekê ELDHyî Urko Aiartzayî ANFyî rê qalê babete kerd.

Urko Aiartzayî ard ziwan ke Rayberê Şarê Kurdî wextêkê dergî ra nata binê tecrîdî de yo û teyna 5 reyî avûkatê xo dîyê. Urko Aiartzayî vat: ''Vanê 43 mengî yo Abdullah Ocalanî ra xeberêke nêna girewtene. No goreyê huqûqê mîyanneteweyîyî îşkence yo. Rewşa Ocalanî yena manaya binpaykerdişê heqê ciwîyayîşî yo.''

Urko Aiartzayî bale ante ser ke ganî dezgehê mîyanneteweyîyî derheqê tecrîdî de mesuldarîya xo bîyarê ca û vat: ''CPTyî çend reyî Îmrali zîyaret kerd û raporî amade kerd. La  rewşe nêvurîyaya. No zî yeno a mana ke dezgehanê mîyanneteweyîyan mesuldarî û rolê xo nêardî ca. Krîterê Mandelayî sey standartêkî seba muameleya verê tepişteyanê sîyasîyan qebul benê. Nê krîterî vanê ke ganî merdimî bi derg û dilayî nêtepişîyê. La nê krîterî seba Ocalanî nênê caardene.

Vera tecrîdê Îmraliyî îradeyêko xurt o sîyasî nêno mojnayene. Seba tepişteyanê sîyasîyan ê sey Abdullah Ocalanî mekanîzmayê caardişî yê xurtî û îradeyo sîyasî lazim ê.''