Mehkemeya Heqanê Merdiman a Ewropa 2014 qerarê wedartişê hepsê muebetî yê Rayberê Şarê Kurdî Abdullah Ocalanî girewt bi la Tirkîya nê qerarî nêanaca. Badê hewt serran raya verêne na rewşe ameye rojdemê Komîteya Wezîran a Konseya Ewropa. Kombîyayîşê komîte de rewşa Abdullah Ocalanî û tepişteyanê bînan ê Îmraliyî bi taybetî zî ''heqê hêvî'' yeno destgirewtene. Kombîyayîşo ke 30ê teşrîna peyêne de dest pêkerd heta 2ê kanûne do dewam bikero. Înîsîyatîfê Ocalanî rê Azadîye çarçewa Dem Demê Azadîye yo de verê banê Konseya Ewropa de çalakîya nobete ya 17 rojan daye destpêkerdene.

Çarçewa çalakîye de kurdîstanijê ke saetanê serê sibayî de verê Konseya Ewropa de ameyî têhet tîya xeyme naye ro û dest pê çalakîye kerde. Roja verên a çalakîye hetê 100 aktîvîstanê CDK-Sî yê ke Swîsre ra ameyî ra ameye dewrgirewtene. Çalakwanan pê pankartan, dovîzan û posteranê Abdullah Ocalanî bale ante rewşa Îmrliyî ser û veng da dezgehanê Ewropa ke wa vera tecrîdî çîyêk bikerê.

Hemserekanê CDK-Syî Selma Surer û Îsmaîl Kardeşî pê eşkerayîya çapemenîye derheqê tecrîd û çalakîye zanayîş da. Hemserekan vist vîrî ke tecrîd 23 serrî yo dewam keno û vat: ''Dewleta tirke bêvengîya dezgehanê Ewropa ra paştî gena. Deweleta tirke heme heqanê merdiman binpay kena  û vera gerîlayan çekanê kîmyewîya şuxulnena. Tecrîd her roje yeno xorîkerdene. Ganî dezgehê Ewropa şirê Tirkîya ser ke qerarê Mehekemeya Heqanê Merdiman a Ewropa cade bêrê caardene.''

Bade eşkerayîye çalakwanan rayîr trafîkî rê birna û ver bi Konseya Ewropa rayra şîyî. Çalakwanan xeylêk wext dekewtişê banê Konseya Ewropa girewt û tewirê înan şermezar kerd. Badê çalakîya roniştişî ya 10 deqeyan çalakwanî agêrayî xeyma nobete. Çalakîye do her roje hetê grûbanê cîyayan ra bêro domnayene.

Hetê bînî ra seba ke Serekkomarê Fransa Emmanuel Macron 2ê kanûne de Konseya Ewropa zîyaret keno Strasbourg de çalakî û aktîvîteyî a roje qedexe yê. Coka do rojêke mabên bidîyo çalakîye. Çalakîye 3ê kanûne de do hetê endamanê TEV-ÇANDî ra bêro domnayene.