Kesê bi nameyê Mehmet Laçînî bi îdîaya ke domanê ci ameyo berdene bi koyan hetê AKP-MHPyî ra verê bînaya HDPyî ya Îzmîre de nobete girewtêne. Semedo ke verê Merkezê Pêroyî de ronişo no kes ame ardene bi Anqara. Vizêr verê Meclîs û Mehkemeya Destûrê Bingeyî de nê kesî eşkerayîye daye û waşr ke serê sibayî verê bînaya Merkezê Pêroyî ya HDPyî de ronişa.

Serê sibayî kuçeyê Merkezê Pêroyî hetê polîsan ra gêrîyayî binê ablûqa. Wekîlê HDPyî zî semedê kombîyayîşî Merkezê Pêroyî de bîyî.

Polîsan waşt ke semedê Laçînî wesayîtî kuçeyan ra bêrê wedarnayene û wekîlî zî debikewê zereyî.

Wekîlan verê ney nêrazîbîyayîşê xo mojna û vat: ''Nêbeno ke şima kiştoxê Denîze Poyraz bîyarê tîya. Wexto ke Denîze Poyraz kişîyabî no zî nobetdar bi. Polîsî ey pawenê.''

Bînaya HDPyî ser o pankarta Denîze Poyraz ameyen daliqnayene. A hele polîsan hêrişê wekîlan kerd.

Binê pawitişê polîsan de kesê bi nameyê Mehmet Laçîn zî xîret kerd ke eşkerayîye bido. Wekîlanê HDPyî pê slogananê 'Kiştoxî şorê' û 'Denîze Poyraz bêmerg a' rewşe protesto kerde.

Wekîlê HDPyî yê Êlihî Mehmet Ruştu Tîryakîyî megafonî ra waşt eşkerayîye bido. Polîsan xîret kerd ke ey ra megafon bigêrê. Wekîl KemaL Bulbulî zî ard ziwan ke ê îradeyê şaranê Tirkîya yê û muxatabê meseleya kurdan zî Abdullah Ocalanî yo. Bulbulî ard ziwan ke ê çareserîyêka demokratîke wazenê.

Mabênê polîsan û wekîlanê HDPyî de reyna nîqaş vejîya. Laçîn wexto ke ver bi bîna ameyêne wekîlan tira vat 'Kiştox biteqîze', 'Denîze Poyraz bêmerg a.' Wekîlan Laçîn asteng kerd. Laçîn binê ablûqaya polîsan de ame berde bi dûrî.

Hetkarê Hemserekanê HDPyî Tayyîp Temelî pare kerd ke Asayîşê Anqara kiştoxêk paweno.

Dima ke polîsan anons dayêne Tîraykîyî newe ra nêrazîbîyayîşê xo mojna û vat: ''Ma wina fikirîyeno ke no kes wextê cînayetê Denîze Poyraz de çimdarîye kerda. Embazê ma vera ney nêrazîbîyayîşê xo mojnenê. Hêzê asayîşî rayîran qefilnenê ma nê.''

Verê bînaya HDPyî de pawitiş dewam keno.