Xeylêk welatanê Ewropa ra kurdî û dostê înan verê Dîwanê Edaletî yê Laheyî de ameyî têhet û ver bi Rêxistina Qedexekerdişê Çekanê Kîmyewîyan (OPCW) rayraşîyayîşêk kerd.

Verê rayraşîyayîşî Hemseraka KCDK-E Fatoş Goksungura ke tîya qisey kerd vat ê semedê protestokerdişê bêvengîya Dîwanê Edaletî yê Laheyî û heme dezgehanê eleqedaran ê Ewropa kom bîyî. Goksungure ard ziwan ke dewleta tirk a ke na bêvengîye ra paştî gena zafêr çeka kîmyewîye şuxulnena û vat ganî dezgehê Ewropa şirê Tirkîya ser ke hêrişanê ci vindarnê.

Hemserekê KNKyî Ahmet Karamusî veng da Dîwanê Edaletî û vat: ''Şarê kurdî zî hewceyê edaletî yo.'' Karamusî vist vîr ke kurdê pê çekanê Ewropa yenê kiştene û vat: ''Dîktator Erdodan cinî, doman, extîyar nêvano û çekanê tewr modernan vera heme kurdan şuxulneno.''

Dimara çalakwanî pê maskeyanê gazî û pankartan ver bi OPCWyî kewtî rayîr. Çalakwanê ke resayî verê OPCWyî tîya rayîr trafîkî rê qefilna û vera  bêvengîya înan nêrazîbîyayîşê xo ramojna. Polisan çalakwanî girewtî binê ablûqa.

Hemserkê Kongra Gelî Remzî Kartalî ke tîya xîtabê şarî kerd nê vatî: ''Dewleta tirke Kurdîstan de; Zap, Metîna, Avaşîn de gazanê kîyewîyan û çekanê qedexeyan şuxulnena. Destpêkerdişê hêrişê dewleta tirke ra nata 6 aşmî û 11 royî yo vera gerîlayan 325 rey çekê kîmyewîyî şuxulyayî. Nê prosesî de zafê înan cinîyî 33 gerîlayî şehîd bîyî.

Fermandarîya Pêroyî ya HPGyî û îdarekaranê KCKyî veng da dinya û vat ke dewleta tirke sûcê şerî kena, vera ci bêveng memamê. Parlamentoyê Ewropa, Konseya Ewropa û parlementoyanê welatan de xeylêk rey ame qiseykerdene. La rixmê heme vengdayîşan dinya kor, kerr lal a. Dinya kam a? AK, YE, NATO, Amerîka ya. Raştîye çîya? Seserre  ya serê şarê kurdî de bêedaletîye dewam kena, komployê mîyanneteweyî dewam keno.

Welatanê Ewropa Şerê Dinya yê Yewinî de şarê Rojhilatê Mîyanênî teberê huqûqî de verdayî. Sîyasetê înkar û îmha yê dewleta tirke vera kurdan ame caardene û seserre ya  dewam keno. Helepçe ra nata vera kurdan çeka kîmyewîye yena şuxulnayene. Seba ke êyê ke yenê qetilkerdene kurd ê û êyê ke qetil kenê tirk ê bêveng manenê.

Ma ewro coka sey şarê kurdî ameyî verê Dîwanê Edaletî yê Laheyî. Ma vat ke wa neheqîya vera kurdan biqedîyo. Ma ameyî verê OPCWyî, ma wazenê vengê xo biresnê. Hinî bêvengîya şima  ya vera kurdan rê bes o. Vengê ma bieşnawi. Qirkerdişan seyr mekerê. Vera kurdan çekanê kîmyewîyan şuxulnenê. Şima ganî şirê vînê, cigêrayîş bikerê rayapêroyîye rê eşkera bikerê. Heta şiknayîşê bêvengîye û ma sey kurdan û dostanê înan do çalakîyan xo bidomnê. Xoverdayîş ciwîyayîş o.''