Vervatoxa DEM Partî Ayşegule Dogan merkezê partîya xo de, kombîyayîşê çapemenîye de rojdem ercna.

Qiseykerdişê Ayşegule Dogan ra tayê noqtayê girîngî wina yê:

''Ez qurbananê Qirkerdişê Mereşî yad kena. Hema zî mesuldrê nê qirkerdişî nêameyî dîyene. ancî 19ê kanûna 2000î de Qirkerdişê Zîndanan qewimîya. Nê qirkerdişî de zî faîlî nêameyî dîyene. 14ê kanûna 2015î de Silopîya de Taybete Ana ameye kiştene û cenazaya ci 7 rojan erdî de mende. Faîlê aye zî nêameyî dîyene.  Edalet key do bêro nê erdî? 

Sere de Tirkîya qet yew hêz ganî mudaxeleyê karanê zereyî yê Sûrîye nêkero. Ganî şarî Sûrîye de pîya bi aramî biciwîyê. Ganî îradeyêko sîyasî bêro mojnayene û Tirkîya ney asteng nêkera.  Eke kurdî Sûrîye de çareserîye ra bêrê teberkerdene çareserîye do mumkîn nêba. Ma veng danê ke kurdan de têkilîyêka zelale wa bêra ronayene. 

Rojawanê Kurdîstanî seba Tirkîya tehlukeyêk nîyo. Coka wa berê dîyalogî bêrê akerdene. Mazlûm Ebdîyî wina veng dayo; 'Seba ke ma seba adirbirnayîşî perwerîya xo bimojnê amade yê ke Kobanê de herêmêka bê leşkeran awan bikerê.' La Tirkîya hema zî bi qiseyê tehlukeyan şarî xapînena. Ma sey DEM Partî veng danê ke wa raştîya kurdanê Sûrîye bêra qebulkerdene. Êyê ke kurdan muxatab nêkenê do bin bikewê.

Ma seba pêvînayîşê bi Birêz Ocalanî muracatê Zîndanê Îmraliyî kerdi. Wezîrîye vat ke ê do wextêkê musaîdî eyar bikerê. No cewab cewabê keyfîtîye yo. Tecrîdo ke binpaykerdişê heqanê merdiman o, dewam keno. Ganî na bêhuqûqîye hinî biqeda. Wa berê ke şinê Îmraliyî bêrê akerdene ke meseleya kurdan bi haştî û demokrasîyî çareser biba. 

Seba haştîye û demokrasîyî Amedî ra rayraşîyayîşêk dîya destpêkerdene. No rayraşîyayîş siba do bireso Anqara.  Ma zî sey DEM Partî tewrê rayraşîyayîşî bibê. Ma waştişê haştî û demokrasîyî berz bikerê. Haştîye heqê pêro şaran o.''