Xeylêk şaristanê Kurdîstan û Tirkîya bi wesîleya serrgêra Qirkerdişê Helebçe aktîvîteyê vîrardişî ameyî kerdene. Aktîvîteyan de ame vatene ke peynîya qetilkaran do  bibo sey Saddamî.

Amed e rêzxistinanê HDP û DBPyî Parka Xezale ya Yenîşehîrî de eşkerayîyêke daye. Eşkerayîye de Hetkarê Heserekê HDPyî yê Bajarî  Îrafan Sonerî qisey kerd. Sonerî bale ante qirkerdişanê vera kurdan û rolê hêzanê mîyanneteweyî yê nê qirkerdişan ser û vat: ''Êyê ke  vera kurdan qirkerdişan kenê do peynîyan zî bibo sey Saddamî. Ma veng danê înanê ke planananê neweyan yê qirkerdişan kenê hînî bes o. Qirkerdişan caverdê pê demokrasî û huqûqî ma mesele çareser bikerê.''

Wekîla HDPyî ya Amedî Semra Guzel zî vist vîrî ke 33 serrî verê ci bi hezaran kurdî pê boya sayan ameyî qetilkerdene û vat: ''Ewro zî Şingal, Rojawan û Başûr de qirkerdişî yenê kerdene. Ma naye hole zanê ke peynîya îşxalkeranê ke qirkerdişî kerdî destê şarî ra ameyo. Nika reyna wazenê ke pê qirkerdişan kurdan û nasanmeyê înan çîn bikerê. Ma reyna tîya ra veng danê, kurdî estê do tim bibê.''

Reyna Dêrsim, Êlih, Şirnex, Wan, Îstanbul, Antalya, Adana, Mersin, Anqara, Hatay û xeylêk şaristananê bînan ê Kurdîstan û Tirkîya de bi aktîvîteyan Qirkerdişê Helebçe ame şermezarkerdene û êyê ke ameyî qetilerdene ameyî vîrardene.