Badê wird errlerzanê girdan ê Mereşî ke bi des hezaran kesan dinyaya xo bedilnaye,  Meletî, Dîlok, Mereş, Amed, Semsûr, Hatay, Kilis, Adana, Riha û Osmanîye sey herêma afate ameyî îlankerdene. Dima ra Xarpêt zî tewrê nînan bi. Şarê Çewlîgî zî seba ke binê rîskî de yo, bi tagê   #BingölAFETbölgesiilanedilsin (Wa Çewlîg sey herêma afate bêro îlankerdene)  gazî keno.

Seke yeno zanayene wird xetê fayî Çewlîg de resenê pê. Coka Çewlîg binê rîskê girdî yê erdlerzî de yo. Xora badê erdlerzê Mereşî heme pîsporî vanê ke ê mabênê qezaya Kanîreş û Çewlîgî de erdlerz pawenê. Çoka çewlîgijî wazenê ke wa Çewlîg zî sey hêrama afate bêro îlankerdene. Rixmo ke Çewlîg sey merkezê erdlerzî yeno zanayene û zaf rey tede erdlerzî girdî qewimîyayî, selahîyetdarê dewleta tirke goş vengdayîşê şarî nêdanê û sey herêma afate îlan nêkenê.

Şarê Çewlîgî wazeno ke bajar sey herêma afate bêro îlankerdene ke banî bêrê kontrolkerene û tedbîrî bêrê girewtene. Seba ke pîsporî semedê erdlerzê Çewlîgî hîşyar kenê, şar qerqilîyeno, terseno binê banenê xo de bimano. Seba ke felaketa ke bajaranê bînan de qewimîyaye wa Çewlîgî de mebo, şar veng dano ke wa tedbîrî bêrê girewtene. Coka wazeno ke wa lezabez Çewlîg sey herêma afate bêro îlankerdene. Çend rojî yo çewlîgijî  medyaya sanale de gazî kenê, qîrênê ke verê felaketêka bîne bîgêrê. Vengdayîşê çewlîgijan çend şino gird beno.