Wan de bi beşdarîya HDP, Partîya Herêmanê Demokratîkan (DBP) û xeylêk rêxistinanê komelê sivîlî de Komployê Mîyanneteweyî ser o Kuçeyê Hunerî de eşkerayîye ameye dayene. Eşkerayîye de pankarta 'Tecrîdî wedarnê, berê Îmraliyî abikerê, haştîye awan bikerê' ameye berzkerdene.

Îdarekarê HDPyî yê Wanî Omer Işikî çalakîye de îfade kerd ke pê xoverdayîşê Rayberê Şarê Kurdî Abdullah Ocalanî Îmrali de komplo nêresa armancê xo û vat: ''Vera têkoşînê demokrasî AKP-MHPyî zêdêr verê xo da tecrîdî, polîtîkayanê şerî, bêedaletî û înkarî û 5ê nîsana 2015î de tecrîdê Îmraliyî newe ra kerd giranêr. Ganî tecrîdî bi lezî bêro wedaritene û seba çareserîya meseleya kurdan verê Abdullah Ocalanî bêro akerdene ke fikranê xo biresno rayaumûmîye.

Key Birêz Ocalan qisey bikero îmkanê çareserîya demokratîke zêdîyenê. Ma pê rewşa weşîya Birêz Ocalanî qerqilîyenê. Êyê ke do bêhuqûqîya Îmraliyî wedarnê têkoşînê hempar ê şaranê ma û hêzanê demokrasî yo. Ma venga partîyan, rêxistinan danê ke vera tecrîdî têkoşîn bikerê.''

Eşkerayîye ra dima çalakîya roniştişî ameye kerdene. Şarî çalakîye de sloganê 'Biciwîyo Serek Apo' û 'Biciwîyo Xoverdayîşê Zîndanan' vatî.