Partîyê sîyasîyî û rêxistinê komelê sivîlî seba ke tecrîdê vera Rayberê Şarê Kurdî Abdullah Ocalanî wedarîyo û seba ke meseleya kurdan çareser bikero  Ocalan azad bibo ewro Wan û Qers de ''Rayraşîyayîşê Azadîye yê Pîlî'' kenê. Rayraşîyayîş do heta 15ê sibate dewam bikero.

Wan de startê Rayraşîyayîşê Azadîye yê Pîlî otêlêke de bi eşkerayîyêke ame dayene. Hemserekê DBPyî Keskîn Bayindir, Hemserekê DEM Partî Tuncer Bakirhan û xeylêk temsîlkarê rêxistinan tewrê rayraşîyayîşî bîyî. Çalakîkeranê rayraşîyayîşî îşlîgê bi nuşteyê ''Rayraşîyayîşê Azadîye/Meşa Azadiyê'' dayî xo ra.

Wekîlê DEM Partî yê Şirnexî Zekî Îrmezî eşkerayîye wende. Îrmezî pare kerd ke bi tecrîdê mutleqî yê Îmraliyî waştişê demokrasî, azadîye û edaletî yê şarê kurdî yenê hedefkerdene. Îrmezî pare kerd ke tecrîdê Îmraliyî teyna meseleya kurdan ney pêro cografya rê tesîr keno û ameyoxê şaran hedef keno.

Îrmezî ard ziwan ke bi Rayraşîyayîşê Azadîye yê Pîlî vera polîtîkayanê tecrîdî cewab do bêro dayene. Îrmezî îfade kerd ke bi wedarîyayîşê tecrîdê Îmraliyî haştî û demokrasî do bêrê welatî.

Îrmezî bale ante ser ke seba ke meseleya kurdan çareser biba, Tirkîya demokratîk biba û sîstemê huqûqî bêro caardene ganî tecrîdê Îmraliyî bêro wedaritene. Îrmezî vat ke serkewtişê Rayraşîyayîşê Azadîye yê Pîlî do verê serkewtişê şaranê Tirkîya û Rojhelatê Mîyanênî bîyaro.