Qezaya Rêya Armûşê ya Wanî de destsernayîşê Şaredarîya Colemêrgî ame protestokerdene. Hemsereka Pêroyî DEM Partî Tulaye Hatimogullari û Hemserekê Pêroyî yê DBPyî Keskin Bayindir zî tede heyetêk têhetameyîşê şarî û esnafî zîyaret kerdî.

Keskîn Bayindirî vist vîrî ke panc rojî yo şarê kurdî û dostê înan vera xespkerdiş AKP-MHPyî payan ser o û vat: ''Ma bajarê xoverdayîşî Wanî ra reyna veng danê. Ma qeyûmanê şina nêsarisnenê û do vera ci bivejîyê. Ma zanê qeyûm çîyo. Qeyûm nêsarisnayîşê ziwan û kulturê kurdan o û ma zanê ke senî texrîp keno. Heqê merdiman binpay keno. AKP têna mîjdana ke dano şarî, şer o, dişmenîye ya. Ma do vera zulmî xover bidê û wayîrê îradeyê xo bivejîyê.''

Tulaye Hatimogullari zî ard ziwan ke şarê kurdî rixmê qeyûm, îşkence, destbendkerdene û tepiştişî peyser game nêerzeno û vat: ''Şima çend zext kenê şar dahîna zaf wayîrê ma vejîyeno. DEM Partî tîya de ya, şa tîya de yo, vera xespkerdişê îradeyî têkoşînê şarî tîya de yo. AKP kurdan rê heqê vîjnayîşî zaf vîneno. Çunke kurdan rê vano şima hemwelatîyê ma nîyê. Mesajanê Erdoganî ra yeno famkerdene xespkerdişê xo do bidomno. La wa nê bizanî ma do her ca de heta peynî xover bidê. Têkoşînê vera xespkerdişî yeno manaya têkoşînê vera faşîzmî. Ma nê têkoşînî de têna nîyê.  Ma do pêro pîya peynîya AKPyî bîyarê.''

Badê qiseykerdişan heta banê DEM Partî bi slogan, çapik  û tîlîlîyan rayraşîyayîş ame kerdene.