Wan de saetanê serê sibayî ra şarî verê xo da warê Newroze. Newroze Parka Newroze de ameye  kerdene ke mabênê Kelaya Wanî û Gola Wanî de ya. Newroza emserî bi şîarê “Rabe dema azadî û sekeftinê ye” yena kerdene.

Reyna qeza û taxan ra şarî verê xo da warê Newroze. Çar nuqtayan de şar kewt warê Newroze û bi coşê govende girewte. Kincanê tradîsyonelan bale antê xo ser.  Cinîyan kiras-fîstan û camêrdan zî bi i şal-şepik kerdî piray. Warê Newroze ra flamê bi rengê kurdan ê neteweyî kesk, sore û zere têşîyayî û vengê “Bijî Serok Apo” û  “Bijî berxwedana zinandanan” bi berz.

Bi tewrbîyayîşê se hezaran kesan şayîya Newroze dest pêkerde. Bedê rêzgirewtişî bi nameyê Komîteya Newroze Ebru Demirtepe qisey kerd. Demirtepe vat, ''Ma tecrîdî qebul nêkenê. Qet hetêkê tecrîdî yo biehleq û bimerdimî çîn o. Şarê ma do nê tecrîdî bişikino.''

Hemsereka Pêroyî ya DEM Partî Tulaye Hatimogullari û Hemserekê Pêroyî yê  DBPyî Keskîn Bayindirî Newroza Wanî de qisey kerd. Qiseykerdişan de ame vatene ke şar azadîya Rayberê Şarê Kurdî Abdullah Ocalanî wazeno û semedê nê têkoşîn keno.

Wekîla DEM Partî ya Wanî Gulcane Kaçmaz Sayyigit mesajê Newroze yê Rayberê Şarê Kurdî Abdullah Ocalanî ke erjnayîşanê verênan ra ameyo peyserkerdene wende

Mesajê ra qismêk wina yo:

''Ma bi des hezaran serî semedê îspatkerdişê şarê kurdî yo ke çîn hesibîyeno, feda kerdî, ma bedelê gidî dayî. Nê fedakarîye, no nêkoşînî  çîyêk in nêşi. Kurdan eslê xo û nasnameyê xo newera fîna dest.  Paradîgmaya mondernîsta ke çîn hesibnena, înaker kena serûbin bîye.

Pêrodayîşê ma vera qet yew nîjad, dîn, mezheb û grûbe nîyo, nêbeno zî. Pêrodayîşê ma vera enciqnayîş, bêzanayîş, neheqîye û peydemendişî yo, vera heme zext û kolonîstan o. Ma cehd kenê ke rixmê heme kêmastîyanê seserre şaranê bindestan bîancê hetê xo û sîstemê modernîteya demokratîke înşa bikerê.

Alternatîfê sîstemê modernîteya demokratîke têna semedê kurdan nê eşkeran heme şaranê Rojhelatê Mîyanênî û dinya bikero azad. Ez na çarçewa de Roşanê Newroze yê heme şaran pîroz kena.

Wext wextê azadîye yo.

Êyê ke hêz danê nê prosesî ez înan selam kena.

Wa biciwîyo Newroze!''

Badê qedîyayîşê şayîye bi des hezaran kesî ver bi merkezê bajarî bi slogana “Bijî Serok Apo” rayra şîyî. Kuçeyê Terzîogluyî de polîsan bi gazê îsotî hêrişî şarî kerd, xeylêk kesî birîndar bîyî  xeylêk kesî ameyî destbendkerdene.  Polîsan helîkopteran ra gazê îsot kerd şarî ro. Ciwanê ke kuçeyan de vila bîyî mabênê înan û polîsan pêkewtiş vejîya.