Seba ke tewrê yadkerdişê Deniz Gezmiş, Yusuf Aslan û Huseyin û aktîvîteyanê 1ê Gulane bîyî, badê 4-5 mengan Antalya û Îstanbul de xeylêk adresî ameyî sereştene û sendîka û partîyanê cîya cîyayan ra bi desan kesî ameyî destbendkerdene.

Wekîko verên ê HDPyî Kemal Bulbulî rewşe ANFyî rê ercna. Bulbulî vat: ''Bi nê operasyonanê qirkerdişê sîyasîyî yeno waştene ke verê wîjnayîşê herêmkîyî hêzê demokrasîyî bêrê krîmînalîzekerdene.  Partî û rêxistinê sey Halk Evleri, DİSK, KESK, EGİTİM SEN, Partîya Karkeran a Tirkîya, EMEPî seba ke Deniz Gezmiş, Huseyin û Înan û Yusuf Aslan yad kerdî yenê sûcdarkerdene. Yadkerdişê şorişgêran nê dardekerdişê şorişgêran sûc o. Na dewlete no sûc kerd, nika zî wazena hêzê demokrasîyî yê ke şorişgêran yad kenê bigêrê binê zextî.

Endamê Meclîsê Ciwanan ê HDPyî zî çend rojî verî bi eynî tewirî bi krîmînalîzekerdişî ameyî destbendkerdene. Antalya de polîtîkaya zext û çokdayîşî kewta dewre. Kenê ke verê vîjnayîşê herêmkîyî şarî bi tersnayîşî biancê hetê xo. Îdarekarê ma û avûkatî semedê serbestveradayîşê embazanê ke nezarat de yê, çîyo ke destê înan ra yeno kenê.  Ma do paştdayîşî xurtêr bikerê û destûr medê waştişê AKPyî bêro ca.''