Dêrsim de weçînayîşê Şaredarîya Perî rê di rojî mendî. Hemşaredarê Amedî Dogan Hatun zî tewrê xebatanê weçînayîşî bi û vat: ''Bi pratîkanê xo ma do cewabê ê kesan bidê ke wazenê îradeyê ma xesp bikerê.''
Bajarekê Perî yê Dêrsimî de 2yê hezîrane de weçînayîşê şaredarîye est o. DEM Partî xebatanê xo yê weçînayîşî rê bêmabên dewam keno.
Vizêr zî DEM Partî dewê Seyîtlî, Basu, Ors, Soreg, Paxnik, merkezê bajarekî û taxî zîyaret kerdî. Namzedê Şaredarîye yê DEM Partî Nacîye Aslan û Orhan Çelebî, Hemşaredarê Amedî Dogan Hatun û Wekîla DEM Partî Aytene Kordu tewrê zîyaretan bîyî.
Aytene Kordu pare kerd ke 2yê hezîrane de ê do Perî apey bigêrê û vat: ''Ma 31ê adare de 78 şaredarîyî girewtî. Şarê Perî zî îradeyê xo yê xespkerdeyî do apey bigêrê.''
Hemşaredarê Amedî Dogan Hatunî îfade kerd ke 2yê hezîrane de şarê Perî do cewabê îqtîdarê AKP-MHPyî bido û vat: ''Şarê ma senî ke Wan de wayîrê îradeyê xo vejîya naye ra pey zî do wina vejîyo. Îqtîdarî zî fam kerd ke kurdî sey verî nîyê. Bi pratîkanê xo ma do cewabê ê kesan bidê ke wazenê îradeyê ma xesp bikerê.''
