Wekîlanê HDPyî Kemal Bulbul, Huseyîn Kaçmaz, Abdullah Koç, Celadet Gaydali, Şevîne Coşkun, Feleknas Uca, Kemal Pekoz, Omer Faruk Gergerlioglu, Erol Katircioglu û Gulîstane Kiliç Koçyîgît Meclîs de kombîyayîşêkê çapemenîye kerd û seba grevê vêşanîye yê tepişteyan vend da.

Nameyê wekîlan ser o Gulîstane Kiliç Koçyîgît qisey kerd û nê çîyî vat:

''Tepişteyî 50 rojan ra nata 120 zîndanan de grevê vêşanîye de yê û wazenê wa îqtîdar abigêro huqûqî ser. Seke raporê Buroyê Asrinî de zî dîya Zîndanê Îmraliyî de pêro heqê Birêz Abdullah Ocalanî û tepişteyan ê bînan wedarîyayî û zîndan vurîya sîstemê tecrîdî.

2018 de zî rayberîya Birêze Leyla Guven de 200 rojan grevê vêşanîye amebi kerdene û 9 kesî nê grevî de merdî. Dima 5 pêvînayîşê avûkatan û 3 pêvînayîşê keyeyan ameyî kerdene la serra 2020î de berê Îmraliyî reyna qefilîya. Têna 3ê adare de pêvînayîşê keyeyî û 27ê nîsane de pêvînayîşê telefonî ame kerdene. Seba ke tecrîd dewam keno tepişteyan 27ê teşrîna peyêne de dest pê grevê vêşanîye kerd.

AKP pêro Tirkîya de tecrîd ano ca. Tirkîya de key tecrîd çinbi aramî û haştîye estbî. Ma na rewşe 2013-2015 de wextê prosesê çareserîye de dibi. Tecrîd vera dîyaloganê şarî hêriş o. Tecrîd seba ke şarî nefes nêgerê, binê polîtîkaya şerî de bimanê newe ra yeno caardene.

Ma vera tecrîdî paştî danê haştî, çareserîye û dîyalogan. Vera tepişteyan zîndanê mîyanê zîndanî de tecrîdê vera tecrîdî yeno caardene.

Tepişteyî û tepişteyê neweşî nê prosesê pandemî de zîndanan de terkê mergî bîyî. Îqtîdar herinda ke na rewşe sereraşt bikero hêrişê muxalîfan û şarî keno. Cigêrayîşo rût vila beno û pê kamerayan cuya tepişteyan yena teqîbkerdene. Îqtîdarî prosesê pandemî de zî tepişteyê edlîyî vera dayî la tepişteyê sîyasîyî sey rehîn zîndanan de tepiştî.

Ma wayîrê waştişanê tepişteyan vejîyenê û vanê 'waştişê înan waştişê ma yê.' Grevê vêşanîye milê ma yê pêroyînan de mesuldarî ya.

Verî zî grevanê vêşanîye de bedelê giranî dîyayî. Coka verî ke zaf erey nêbo ganî ma sey hêzê muxalefetî têbigêrê.

Ma venga rayaumûmîya demokratîke danê ke veng bida vengê tepişteyan. Ma îqtîdarî ra nê hêzanê komelkîyan û terefgîranê demokrasî ra pawenê ke têbigêrê. Ma venga şima danê ke cuya tepişteyan mevisnê binê rîskî.''