Wekîlê HDPyî ewro zî vera tecrîdê serê Rayberê Şarê Kurdî abdullah Ocalanî ver bi Wezîrîya Edaletî şîyî. Wekîlanê HDPyî Tulaye Hatîmogûllari, Erdal Aydemîr, Ayşe Surucu, Mehmet Ruştu Tiryakî, Hasan Ozguneş, Abdullah Koç û Kemal Bulbulî rayraşîyayîş de cagirewt. Wekîlan rayraşîyayîş de dowîzê bi nuşteyê 'Wa Îmrali de goreyê huqûqî têbigêrê' akerdî.

Reyna verê Berê Dîkmenî yê Meclîsî de polîsan wekîlî asteng kerdî. Tîya de nameyê wekîlan ser o Tulaye Hatîmogullari eşkerayîye daye û qisey kerd.

Tulaye Hatîmogullari pare kerd ke tecrîd vilayê pêro Tirkîya bîyo û vat: ''Îqtîdar wazeno welat de rejîmê otorîterî awan bikero coka îradeyê şarê kurdî tecrîd keno. Birêz Ocalanî seba çareserîye xeylêk fikrî pêşnîyaz kerdbî û vatbi ke o eşkeno na mesele cade çareser bikero. Tradîsyonê dewleta tirke û pêro îqtîdaran meseleya kurdan 40 serrî yo bêçare verdeno. Herinda nê tecrîdê girankerdeyî de ma dîyalogî wazenê. Ma wazenê tecrîd cade bêro wedaritene. Zîyaretê CPTyî yê Îmraliyî ra dima hem keye û avûkatê ci hem zî şarê kurdî û hêzê demokrasî derheqê rewşa Ocalanî de qerqilîyenê.

Sere de ê Wezîrê Edaletî û dima zî wezîfeyê Qesre yo ke na babete de eşkerayîye bidê. Wezîrê Edaletî nêeşkeno erkê xo bîyaro ca. Na wezîrîye pêro fermanan Qesre ra gêna. Ma reyna rejîmê Qesre rê vanê ke ganî şar rewşa Birêz Ocalanî ra agahdar bibo û goş bido waştişanê şarî ser. 'Heqê hêvîye' seba pêro tepişteyan heqêko sereke yo. Serê esasê heqê hêvîye de ma wazenê tecrîdê vera Birêz Ocalanî wa bêro wedaritene û Ocalan cade bieşko keye û avûkatanê xo bivîno. Heta nê waştişî bêrê caardene ma do nobete rê dewam bikerê.''