Wekîlanê HDPyî seba ke Rayberê Şarê Kurdî Abdullah Ocalan bieşko avûkatanê xo bivîno verê Wezîrîya Edaletî de dest pê nobete kerdbî. Çalakîya nobete roja 4. de dewam kena. Wekîlê HDPyî Tayîp Temel, abdullah Koç, Kemal Pekoz, Muazzeze Orhan, Celadet Gaydali û Gulistane Kiliç Koçyîgît ver bi Wezîrîya Edaletî şîyî. Wekîlî Berê Dîkmenî yê Meclîsî de hetê polîsan ra ameyî astengkerdene.

Polîsan vat ke 'ferman' dîyayo ke wa destûr nêro dayene ke wekîlê HDPyî şorê verê Wezîrîya Edaletî. Polîsan rojnamegerî zî tehdît kerdî û ê warî ra dûrî vistî.

Hetkarê Hemserekanê Pêroyîyan ê HDPyî Tayîp Temelî pare kerd ke seba ke Abdullah Ocalan bieşko avûkatanê xo bivîno înan verê Wezîrîya Edaletî de dest pê nobete kerdo û vat: ''Ewro Berê Dîkmenî de polîsan verê ma girewt û nêverda ke ma şorê Wezîrîya Edaletî. Seba protestokerdişê na bêhuqûqîye ma tîya de yê. Ma do eşkerayîya xo ya serê tecrîd û rewşa krîtîke ya Îmraliyî ewro bidê. Ma na nobete rê dewam bikerê. Ganî her kes nê çîyî bizano.''

Wekîlanê HDPyî astengkerdişî ser o verê Berê Çapemenîye yê Meclîsî de eşkerayîyêke daye. Eşkerayîye de ame vatene ke îqtîdarê AKP-MHPyî pê polîtîkayanê şer û tecrîdî keno ke pêro komelî kontrol bikero û tecrîd pêro komelî rê vila bîyo. Eşkerayîye de ame parekerdene ke Tirkîya bi bêhuqûqî, keyfîyet û bêcidîyetî yena îdarekerdene.

Eşkerayîye wina dewam kena: ''Wa Îmrali de Birêz Ocalan û tepişteyê bînî bieşkê avûkatanê xo bivînê. Şarê kurdî, rayaumûmîye, keye, dezgeh û rêxistinê komelê sivîlî pê rewşa Birêz Ocalanî qerqilîyenê. Îmrali de tecrîdêko keyfî est o. No tecrîd pêro Tirkîya rê vila bîyo. Tecrîd goreyê qanûnanê nê welatî sûc o. Ganî verê qesawetê şarî bêro girewtene. Ma venga Wezîrê Edaletî Bekîr Bozdagî danê ke wa verê pêvînayîşê Îmraliyî abikero, derheqê babete de eşkerayîye bido.''