Dosyaya kişîyayîşê Olof Palmeyî 34 serran ra dima Stockholm de pê kombîyayîşêkê çapemenîye ameye padayene. Derheqê girîngîya babete ya seba kurdan û PKKyî de ma nuştox û sîyasetmedaranê Swêdî û Kurdîstanî reyde qisey kerd.

Rojnameger Lars Borgnaso ke serra 1986î ra nata serebûtê kişîyayîşê Olof Palmeyî teqîb kerdêne pare kerd ke Polîsanê Asayîşî yê Swêdî (Sapo) yan zî komêka Sapoyî ke Palme vera dewlete sey gefêk dî, o kişt.Borgnasî pare kerd ke sûcê kişîyayîşê Palmeyî destpêk de erzîya milê PKKyî dima zî erzîya alkolîjê bi nameyê Chîrster Petersson û bi nê hawayî ame xîretkerdene ke raştîye bêra mîyankerdene.

Mahkemeya Berze da zanayene ke delîlêk çin o îsbat bikero ke Petersson o kişt û bira veradayîşî dîyaye. 

Nuştoxê kurdî Şoreş Reşî yo ke bi serran o serebûtî ser o cigêrayîş keno û derheqê ci de kitabêk nuşt, vist vîrî ke kiştoxo asil Bergstrom serra 2000î de merd û vat: ''Derheqê merdeyî de dewa nêeşkîyena abiba, bi nê hawayî dosyaya qefilîyaye. No seba Swêdî zaf asan bi ke xo mîyanê nê serebûtî ra vejo. Ez dozger yan zî polîs nîya. Beno ke no kes endamêkê îstîxbaratî bi. PKK partîyêk a ke seba şerê azadîye awan bîye. Sûcdarîya Palmeyî ra 20 kurdî tepişîyayî labelê derheqê înan de dokumentêk çinbi.Eşkera bi ke eleqeyê PKKyî pê nê serebûtî çin o. Kişîyayîşê Palmeyî de rolê Tirkîya, îstîxbarat, welatanê Ewropa esto. Swêd nê pêroyînan zaneno. ''

Wekîlê Partîya Çepe Hakan Svenneligî zî vat: ''Ganî Swêd û Yewîya Ewropa PKK lîsteya terorî ra vejê. Ganî Swêd kurdan ra uzrê xo biwazo.''

Wekîlê Partîya Çepe Daniel Riazatî zî derheqê babete de wina vat: ''Kurdî seke mesuldarê kişîyayîşê Palmeyî yê ameyî mojnayene. Nê zaf tesîrê Têgêrayîşê Azadîye yê Kurdîstanî û şarê kurdî kerd. Ganî no bêro sererastkerdene û heqê kurdan bêrê dayene. Ganî Swêd û Ewropa PKK hînî sey rêxistina terorî nêvînê. Kurdê Ewropa ganî ney welatanê Ewropa ra biwazê.''

Wekîla Sosyalîste Amînehe Kakabave vat: ''Ganî şarê kurdî bieşkê medyaya Ewropa de raştîyan binusê. Ganî her kes pê bihesê ke PKKyî rê 34 serran ra nata neheqîye yena kerdene. Ganî morê rêxistina terorî ra PKKyî bêra estaritene. Ganî dewleta tirke û Erdogan hînî nêeşkê sûcdarîya 'rêxistina terorî' vera kurdan bixebitnê.''