Wekîla HDPyî Semra Guzela ke sey rehîne yena tepiştene wekîlîya ci hetê Heyetê Pêroyî yê Meclîsî ra ameye xespkerdene.

Heyetê Pêroyî yê Meclîsî de semedê wardayîşê wekîlîya Guzele reydayîş ame kerdene. Hemserekê Pêroyî yê HDPyî Pervîne Buldan û Mîthat Sancar zî Heyetê Pêroyî de cayê xo girewt. Wekîlanê HDPyî dovîzê ke ser o “Semra Guzel wekîla şarî ya”  û “Semra Guzel îradeyê şarî ya”  nuştebi kiriştî.  Wekîlan pê sloganan raydayîş protesto kerd.

Reydayîş de vera 330 reyanê qebulkerdişî 42 reyê redkerdişî ameyî şuxulnayene. AKP, MHP, ÎYÎ Partî û CHP reyê xo semedê wardayîşê wekîlîye şuxulnayî. Heme wekîlanê HDPyî zî semedê nêwardayîşî reyê xo şuxulnayî.

Wekîlê HDPyî yê Riha Omer Ocalanî vat pê wardayîşê wekîlîya Guzele wazenê vîjnayoxanê HDPyî ra qesas bîgêrê la şarê ma do demê tewr kilmî de cewabê nê îqtîdarê zalîmî yê dişmenê kurdan bido. Wekîla HDPyî ya Şirnexî Nurane Îmîr zî vat ê do çirey vera zextan milê xo çewt nêkerê. Serekwekîlê Grûba HDPyî  Saruhan Oluçî  zî  vat êyê ke wazenê HDPyî rê bidê vînkerdene do zaf gir vîn bikerê.

Wekîlanê HDPyî semedê protestokerdişê qerarî Heyetê Pêroyî ra vejîyayî.