Wekîlê çepgîrî yê herêma Roubaixî yê Fransa David Guiraudî bale ante serê hêrişê nîjadperestêkê tirkî yê vera kurdêkê hewlêrijî ser û dîyar kerd ke ganî pawitişê kurdan qetî bibo karê înan o verên.
Dima ke 23yê kanûne de paytextê Fransa Paris de 3 kurdî ameyî qetilkerdene 26ê kanûne de narey zî şaristanê Roubaixî yê Fransa de kurdêko hewlêrij hetê tirkêkê nîjadperestî ra amebi birîndarkerdene.
Dozgerî derheqê sebebê hêrişî de agahîyêke nêdaye la pare kerd ke hêriş hetê tirkêkê 47 serrî ra ameyo kerdene û derheqê hêrişî de tehqîqatê xîretê kiştişî da destpêkerdene. Goreyê dozgerîye kurdo hewlêrij bi meqesî 27 cayê xo ra ameyo birîndarkerdene. Çimeyêkî AFPyî rê qisey kerd û vat ke kurdo hewlêrij seba ke muzîkê kurdkî goşdarî kerdêne raştê hêrişî ameyo.
Partîya Çepe ya Fransa 'La France Insoummise' ra Wekîl David Guiraudî derheqê babete de twitter de eşkerayîyêke daye û îfade kerd ke hêriş seba ke kurdî muzîkê bi kurdkî goşdarî kerdêne ameyo kerdene.
Guiraudî vat: ''Ez musaya ke şaristan de salonêka kuaforî de kurdêk seba ke muzîkê bi kurdkî goşdarî kerdêne bi kardî ameyo birîndarkerdene. Mi Walî ra waşt ke nê serebûtî sereraşt bikero.''
Wekîlê çepgîrî waşt ke ganî karê înan o sereke no bibo ke kurdî hêrişan ra bêrê pawitene.
