Wekîla SPyî Vane Dijk 26ê çeleyî de derheqê tepişteyanê sîyasîyan ê Tirkîya, kerdişanê vera înan, rewşa Aysele Tugluk de persnameyêk dabi Wezaretê Karanê Teberî.

Wezaretanê Karanê Teberî cewab da persnameyî û pare kerd ke Hollanda babetanê caardişê huqûqî, heqanê merdiman, azadîya fikran, heqê muhakemekerdişî de xeylêk pêvînayîşan de meqamanê Tirkîya reyde asta resmî û sîyasîye de nîqaşan kena.

Derheqê Aysele Tugluk de zî no cewan ame dayene: ''Hayîya hukmatî pê rewşa Aysele Tugluk esta û sersefîrîya Anqara rewşe teqîb kena. Agahîyê ke hukmatî ra gêrîyayî, rewşa weşîye hetê dezgehan ra yena cigêrayene. Birêze Tugluke waşt ke heyetêko xoser hetê weşîye ra aye kontrol bikero. Hollanda qesawetê xo yê serê babete ard ziwan û do warê mîyanneteweyî de ney rê dewam bikera. Hayîya hukmatî pê esta ke Tirkîya de tepişteyî nêeşkenê biresê heqê xo yê weşîye. Hukmat serra 2020î ra nata hedefanê Planê Çalakîye yê Heqê Merdiman û Demokrasî yê YE tesdîq kenê ke plan bi zelalî qala weşkerdişê şertanê tepişteyan keno. Na çarçewe de Hollanda bi rayîrê projeyêkî xurtkerdişê kontrolê teberî yê dezgehanê cezaya înfazî yê Konseya Ewropa rê israr kena ke rewşa tepişteyanê nêweşan ê Tirkîya weş bikera.''