Wezîrê Paştdayîşê Komelkîyî yê Îtalya yê verênî Paolo Ferreroyî derheqê serebûtanê Sûrîye û hêrişanê vera kurdan de ANFyî rê qisey kerd.

Ferreroyî da zanayene ke rejîmê Sûrîye bi destekê Tirkîya, Îsraîl û Amerîka rijîyayo û vat: ''Hemsengîya Sûrîye ameye xirabkerdene. Îsraîlî pêro Girê Golanî û herêmê cîranî yê Lubnanî îlhaq kerdî. Tirkîya zî kena ke Rojawanî îşxal bikera. Senî ke DAÎŞ vera kurdan şuxilîya nika zî komê cîhadîstî yê bînî vera kurdan şuxilîyenê.

HTŞ zî rêxistinêka terorîste ya ke ganî ameyoxê Sûrîye pabesteyê HTŞyî nêro kerdene. Ma do bivînê ke Amerîka mudaxele bikera yan ney. Eke Tirkîya vurnayîşê rewşa Sûrîye de israr bikera o çax ziwanê şerî ancî do qisey bikero.''

Paolo Ferreroyî îfade kerd ke Erdogan tehamulê xoserîya kurdan nêkeno û wazeno. Ferreroyî vist vîrî ke merkezê meseleyanê serekeyan ê Sûrîye de feraseto ke cîyarengîye qebul nêkeno est o û vat: ''Hêrişê vera kurdan nênê qebulkerdene. Ganî ma tedaya Tirkîya û Amerîka bikerê. Modelê Rojawanî bi îlhamê fikranê Abdullah Ocalanî seba demokrasîyî alternatîf o. 

Dewleta tirke wazena ke Sûrîye de sembolê xoverdayîşê kurdan çin bikerê. Coka wazena hêrişê Kobanê bikera. Seba ameyoxê Sûrîye tek model ganî bêro esaskerdene; Rojawan. La wazenê ke ney çin bikerê. Coka ganî ma paştî bidê Rojawanî-Îdareyê Xoserî. Rojawan seba merdimatîye mîras o, ganî ma ey bipawê.''