Wezîrê Edaletî yê Fransa Eric Dupond-Morettiyî Konseya Kurdanê Demokratîkan  (CDK-F) ra heyetêk qebul kerd. Wezîrî kombîyayîşê çapemenîye yê bi temsîlkaranê kurdan de vat: ''Ma her çîyî ra ver seba ke paştî bidê kurdan nê pêvînayîşî kenê.''

Wezîrî wina qisey kerd: ''Ez keye û meridmanê înan fîkîryena. Fransa sîya giredayo. Bêşik ez nêeşkena xo bikerê herdinda mercîyanê edlîyan. Goreyê qanûnan seba ke dewa dewam kena ez nêeşkena derheqê ci de qisey bikerî. La Wezîrîya Edaletî zî garantorê qanûnan a. Coka mi waşt bi temsîlkaranê kurdan pêvînayîş bikerî. Ferqê xayînîya nîjadperestîye û çalakîya terorîstî îdeolojîyo sîyasî yo. Badê cipersayîş û cigêrayîşan beno ke pênaskerdiş bêro bedilnayene. Xora cezayê ci secîye yê. Ma şertanê huqûqî ra tewîz nêdanê.''

Wezîrî hêzanê pawitişî û hemwelatîyanê kurdan ê ke hêrişkar kerd bêtesîr înan rê spas kerd û vat seba ke mexdûrî nê qewimîyayîşî xo dima biverdî ê do bi komeleyanê kurdan planêkê paştdayîşî bikerê.

Serdozgerîya Parisî badê hêrişê ke hîrê aktîvîstê kurdî ameyî qetilkerdene herinda ''hêrişê terorîstî'' de sey ''cehdkerdişê cînayetê nîjadperestî'' cipersayîş da destpêkerdene.

Kurdan, çepgîran û temsîlkaranê partîyanê sîyasîyan vera nê nêrazîbîyayîş mojna û waşt wa no hêriş sey ''hêrişê terorîstî'' bêro pênaskerdene û hetê Serdozgerîya Atnî-Terorî ya Mîyanneteweyîye cipersayîş bidîyo  destpêkerdene.