DEM Partî Vakurê Kurdîstanî de xebatanê xo yê weçînayîşanê 31ê adare rê bi coşî dewam kena.

Şirnex de qezaya Elkê de namzedanê Şaredarîye keye û esnafî zîyaret kerd. Zîyaretan de venga şarî dîya ke wa wayîrê sindoqan vejîyo.

Amed de qezaya  Sûr de  esnafî ameyî zîyaretkerdene. Dima namzedî Pinare Sakik Tekîn û Abbas Şahîn, wekîl Serhat Erenî ver bi buroyî rayraşîyayîş kerd. Dima şarî rê vilawekî ameyî vilakerdene û govende ameye girewtene.

Riha de qezaya Serêkanîyê, Pirsûs, Eyûbîye de û merkez de namzedanê DEM Partî ber bi berî şar û esnafî zîyaret kerdî, broşurî vila kerî û venga şarî da ke wa 31ê adare de îradeyê xo bimojno.

Wan de qezayanê Artêmet, Tûşba û Rêya Armûşî de vilawekî ameyî vilakerdene. Merkezê şaristanî de zî seba beşdarîya mîtîngê sibayî venga şarî ame dayene. Mîtîng diba 13.00 de Parka Musa Anterî de do dest pêbikero.

Xarpête de qezaya Depe de kombîyayîşê şarî ame kerdene. Wekîla DEM Partî Gulîstane Kiliç Koçyîgît zî tewra kombîyayîşî bîye. Dima kombîyayîş vurîya mîtîngî. Namzeda Şaredarîya Depe Songule Duzgun sîyasetmedarê tepişteyî selam kerdî û pare kerd ke 31ê adare de şar peynîya sîstemê dizdan do bîyaro. Gulîstane Kiliç Koçyîgît zî ard ziwan ke îqtîdar kurdan çin hesibneno û meseleya kurdan çaresern nêkeno la wexto ke teng beno dano berê kurdan ro. Gulîstane pare kerd ke ganî meseleya kurdan bi rayîrê demokrasîyî çareser biba.