Xelatê Musa Anterî û Şehîdanê Çapemenîya Azade yê 31inî  Merkezê Kulturî yê Cemîl Candaşî yê Îstanbulî de bi merasîmêkî ameyî dayene. Salone bi fotografanê Musa Anter û Gurbetellî Ersoz ameye xemilnayene. Xeylê sîyasetmedar, rojnameger, aktîvîst, pawitoxê heqanê merdiman tewrê merasîmî bîyî.

Merasîm de nameyê rojnameyê Yeni Yaşamî ser o Kîbrîye Evren qisey kerd. Kîbrîye pare kerd ke çapemenîya azade dejê kurdan tim ardê ziwan û nê oxirî de xeylêk xebatkarê çapemenîye şehîd bîyê.

Hemserekê DEM Partî Tuncer Bakirhanî zî ard ziwan ke generalê Apê Musayî yê qijî bîyê nuştox, îdarekar û karîkaturîstê çapemenîya azade û rayîrê ey rê dewam kenê. Bakirhanî vat: ''Şagirtanê Apê Musayî qelema ey war de nêverdaye.''

Gultane Kişanak îfade kerd ke xeyrê çapemenîya azade raştîyî binê tarîtîye de nêmendê.

Dima xeletî ameyî dayene.

Beşê xeberanê bi tirkî de muxabîrê T24î Cengîz Anil Bolukbaşî, muxabîra Jinnewsî Dîlane Babat xelata jurî ya taybete, beşê xebera kurdkî de muxabîra ANHA Silava Ebdulrehman Mihemed Emîn, beşê fotografan de muxabîrê Ajansê Mezopotamya (MA) Mujdat Canî, beşê xebera cinîyan de Rahîme Karvar xelate girewte.

Xelata Rûmetî zî seba vîrameyîşê rojnamegeran Gulîstane Tara û Hêroye Bahadîn dîyaye ke hêrişê dewleta tirke de şehîd bibî. Xelata Rûmetî dîyaye Pexşane Ezîzî ke dewleta Îranî cezaya dardekerdişî dabî ca.

Merasîm de mesajê Pexşane ame wendene. Pexşane mesajê xo de şexsê Mûsa Anter, Gurbetellî Ersoz, Denîz Firat, Karwan Hewramî de pêro şehîdê çapemenîya azade yad kerdî û vat ke a xelate dîyarîya teqîbkeranê felsefeya 'Jin, Jiyan, Azadî' kena.

Peynîya merasîmî de Koma Hevra vejîyaye sehne ser.