Partîya Demokrasîyî û Têdûştîye ya Şaran (DEM Partî) xeylêk bajaran de serkewtişê xo yê weçînayîşê 31ê adare fîraz kerd.

Wan de şaro ke Parka Haştîye ya Musa Anterî ame têhet bi slogananê "Bijî Serok Apo", "Bijî berxwedana zindanan", "Jin, jiyan, azadî"  serkewtişê xo fîraz kerd. Hemsereka DEM Partî ya Bajarî Gulşene Kurt vat: ''Şarê Wanî 14 de 14 kerd û tarîx nuşt, bajar qeyûm ra xelisna û cewabo tewr pîl da.'' Hemşeradanê Şaredarîya Bajarê Pîlî yê Wanî Neslîhane Şedal û Abdullah Zeydan zî keyfweşîya xo ard ziwan, şarê Wanî rê spas kerd û vat: ''Şarê ma wayîrê îradeyê xo vejîya û verê haştîye komlekî akerd.'' Badê qiseykerdişan hunermend Kadir Çatî konser da.

Agirî de zî serkewtişê DEM Partî ame fîrazkerdene. Hemşaredaranê Agirî Mehmet Akuş û Hazale Aras vat, ''Şima tarîxêk newera nuşt. Êyê ke şima nêvînayîşî ra yenê, şima cewabo pîl da ci.''

Sêrt de zî meydanê Newroze de serkewtişê DEM Partî ame fîrazkerdene. Hemşaredaranê Agirî Sofya Alagaş û Mehmet Kaysî şarî rê spas kerd û soz da ke do şaredarî bikerê şaredarîya şarî.

Qereyazîya Erziromî de zî serkewtişê DEM Partî ame fîrazkerdene.  Bi seyan kesê ke verê banê partî de ameyî têhet bi serkewtişê xo fîraz kerd. Hemserekan Bahare Goksu û Futat Tutkunî keyfweşîya xo ard ziwan û şarî rê spas kerd.

Milazgîrê Mûşî de sî bi seyan kesê ke ameyî têhet serkewtişê DEM Partî bi govendan fîraz ker. Hemşaredaran Gulîstane Ozel û Ahmet Kenan Turker serkewtiş  sey îrade û serkewtişê şarî pênas kerd.