Xoverdayîşê Amedî: Qet kes nêeşkeno ma birijno!

Nobeta Demokrasîyî ya vera xespkerdişê şaredarîyanê HDP’yî ya ke Amed de yena virştene roja 25’ine dewam kerde.

Çalakîyê vera xespkerdişê şaredarîyanê Amed, Wan û Mêrdînî dewam kenê. Amed de ewro reyna Nobeta Demokrasîyî ameye viraştene û vera qeyûman mesajê xoverdayîşî ameyî dayene.

Hemserekê HDP’yî yê Amedî Zeyat Ceylano ke eşkerayîye de qisey kerd bale ante derbeya 12’ê Êlule ser û va:‘‘ Kurdan bi xoverdayîşî zîhnîyetê Kenan Everînî bin fîna. Xoverdayîşê şarê Kurdî û zîndanan do her wext kitabê şorişê de bi herfanê zerrênan cayê xo bigêro. Sey vizêrî ewro zî do xoverdayîşê şarê Kurdî ser bikewo.‘‘ Qiseykerdoxanê bînan zî vera qeyûman razînêbîyayîşê xo ard ziwan û ame vatene ke qet kes nêeşkeno Kurdan birijno.