Grêvê vêşanîye yê bêdem-bidore yo ke tepişteyanê sîyasîyan 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan dabi destpêkerdene,  39 rojî yo  dewam keno.

Badê grevê vêşanîye zextê vera tepişteyan zêdîyayî. Tarsus de îdareyê zîndanî melzemeyanê sey şeker, sol û lîmonî tepişteyan nêdano. Kandira de dest nîya melzemeyê taybetî yê tepişteyanê ke grev de yê ser. Alanya de cezaya disîplînî diyaye tepişteyan ê cinîyan û hele ke înan binpaykerdişê heqan dayene eşnawitene telefonê înan ameyî birnayene. Riha de tepişteyê ke grev de yê testê Korona ê înan nîna kerdene. Şakran de roja destpêkerdişê grevê vêşanîye ra nata zextî dilab-hîrlab zêdîyayî. Reyna xeylêk zîndananê bînan ra zî xeberê zafbîyayîşê zextan û derbkerdişê tepişteyan yenê.

Heyetê Çimdarî yê Grevê Vêşanîye rojanê ravêrteyan de eşkerayîye dayebî û veng dabi ke wa nêrazîbîyayîşo komelkî bêro xurtkerdene ke zîndanan ra cenazayî mevejîyê. Reyna Komeleya Komelê Sivîlî yê Sîstemê Înfazê Ceza (CÎSST) zî vat jan wextê grevê vêşanîye de dilab birîsk o û semedê çareserî veng da.

Hetê bînî ra Mexmûr de zî grevê vêşanîye yê vera tecrîdî roja 18. de dewam keno.