Ewro bi şîarê 'Vera komployî ma xo ver danê, seba azadîye Amed de yenê têhet' mîtîng est o. Xeylê şaristanan ra şar ver bi Amedî herikîyeno. Polîsî bi hawayêkê sîstematîkî şarî asteng kenê.

Dêrsim de girse Truşmek de hetê polîsan ra ame astengkerdene. Çalakîkeran kornayî cinitî û polîsî protesto kerdî.

Qezayanê Elkê, Qileban, Basa, Hezex, Silopîya û Cizîre û merkezê Şirnexî ra bi seyan kesî ver bi Amedî kewtî rayîr. Şar bi kincanê xo yê neteweyîyan, tîlîlî, çepik û sloganan ver bi Amedî şino.

Riha de qezaya Karakopruyî de polîsî girseyî asteng kerdî. Girseyo ke tede Wekîlê DEM Partî Ferît Şenyaşar zî est o, bi deyîranê Hozan Reşatî pawitişê xo rê dewam keno.

Adana de zî polîsan girseyî asteng kerdî. Astengkerdiş ame protestokerdene. Hemserekê DEM Partî yê Adana Seyfettîn Aydemîrî vat ke ê do qetî şorê Amedî.

Mersîn de polîsan otobusê çalakîkeran vindarnayî. Verê bînaya DEM Partî ya Akdenîzî de bi çalakîya roniştişî astengkerdiş ame protestokerdene. Hemserekê DEM Partî yê Mersînî Reşat Aşanî tîya de vat: ''Tecrîd de israr, şer de israr o.''