S.A.yî 10ê tebaxe de saete 04:00 de hêrişê bînaya HDPyî ya Bakirkoyî kerdbi û hetê Mehkemeya Bakirkoyî ra bi şertê kontrolê edlîyî ame veradayene. Mehkeme bire daye ke ganî S.A. hewte de rayêke şoro qereqolî îmza bido û qasê 200 metreyan nêzdîyê bînaya HDPyî ya Bakirkoyî nêbo.

Hemserekê HDPyî yê Bakirkoyî Ferdî Yamarî ANFyî rê mesele ercnaye.

Hemserekê HDPyî yê Bakirkoyî Ferdî Yamarî vera hêrişî nêrazîbîyayîşê xo mojna û vat: ''Seke hêrişkerî rê xelate ameye dayene. Eke no hêriş vera partîyêka bîne biameyêne kerdene hêrişker do biameyêne tepiştene. Hêrişkerî cam û berê ma şikitî, verê berê ma herimna. No zaf şîyo zorê ma. No zî mojneno ke peyê hêrişkerî de hêzê tarîyî estê.''

Yamarî eşkera kerd ke hêrişkerî mengêke verê cû wextê merasîmê yadkerdişê qurbananê Qirkerdişê Sirûcî de zî ameyo destbendkerdene la mehkeme de vat o paştî nêdano HDP. Yamarî vat: ''Gelo no kes provakator nîyo? Îfadeyê xo de vano o paştî nêdano HDP la tewrê merasîmê Sirûcî yê HDPyî beno. Tay kesî seba provakekerdişî dekewenê çalakîyan, no kes maneno înan.''

Yamarî ard ziwan ke eke reyna vera bîna hêriş bêro kerdene û çîyêk bêro embazanê înan ser mesuldara ci dewlet a.