Hemsereka DBPyî ya Amedî Sultane Yaraya ke ANFyî rê qisey kerd, vat ê do hinî destûr medê dizdîya îqtîdarî.

Sultane Yaray ard ziwan ke weçînayîşanê 31ê adare de AKP Kurdîstan de bi partîya tabele û nê vatî: ''Cayê ke DEM Partî ser kewt îtîrazê ci kerd, bi xîleyan kerd ke xesp bikerê la Curnê Reş de ma reyna dî ke rixmê xîleyanê înan DEM Partî partîya yewin a. Îqtîdarê AKP-MHP dişmenê kurdan o. Tehemul nêkeno kurdî herra xo de nefes bîgêrê. Ça de yew destkewteyê kurdan est o, ça de statuyêk est o hêrişê ci kenê.

Her ca de wazenê cayê kurdan bikerê teng.Tecrîdê Îmralîyî zî leteyêkê nê yo.Ganî şarê kurdî vera nê zafêr rêxistinkerde têkoşîn bikero. Bi qeyûman îradeyê şarê kurdî xesp kenê, benê sebebê şewatan û mudaxale nêkenê. Ma şewatê Şemrex û Çinarî de nêzdbîyayîşê înan reyna dî. Cuyeya kurdan ercan vînenê.  Merg, surgun û şewat qederê kurdan nîyo.Şarê kurdî vera zextan û hêrişanê dewlete wayîrê şaredarîye, xoza û kulturê xo vejîyeno. Sîstem çend hêrişê xo bizêdîno, şarê kurdî do têkoşînê xo xurtêr bikero.''

Sultane Yaray bale ante elemananê bankamatîkan ser ke semedê provokasyonî şawîyenê verê şaredaran û nê vatî: ''Kesê ke çirey şaredarîye de nêxibitîyayî û têna sereyê menge de bakamatîk ra meaş ancenê , verê şaredarîye de slogananê heqî erzenê. Ma zanê ê kam ê.Şaredarîyanê ma na babete de çîyo ke hewce keno kerd. Ê çend wazenê ma hedef bimojnê ra, raştîye werte de yê. Gama ke pereyê înan birîya verê şaredarîyan de ke çirey nêameyî tîya, xeymî nayî ro.  Ni zîhnîyet do bin bikewo. Ma do destûr medê ê yê şarî bidiznê.''