12 sibata 2019î de bi fermanê Wezîrê Karanê Zereyî Horst Seehoferî di dezgehê pîlî yê kurdanê Almanya Weşanxaneyê Mezopotamya û Mîr Muzîk amebî qedexekerdene. Polîsanê almanan di rey eşt  dezgehan ser û kitabê domanan, kitabê musayîşê kurdkî zî tede des nayî zaf kitaban ser.

Almanya de sere de muxalefet zaf rêxistinanê sivîlan, weşangeran vera nê tevgêrayîşî nêrazîbîyayîşê xo mojna. Sey Unrast-Verlag, Manelbaum Verlagî yê Awustralya, Edition 8î yê Swîsî  tay weşanxaneyan seba Weşanxaneyê Mezopotamya kampanyaya hetkarîye dabî destpêkerdene. Çarçewa kampanya de armanc no yo ke bi nameyê “Edition Mezopotamya” kitabê ke dest nayîye ser reyna bêrê çapkerdene.

Horbach: Çira  dest na arşîvê muzîkî û kitaban ser?

Yewîya Weşangeranê Almanya zî paştî daye kampanya. Verfekê Grûba Azadîya Fikran a Yewîye Jurgen Horbachî derheqê kampanya de radyoyê “Deutschlandfunk kultur” reyde qisey kerd û vera qedexekerdişê kitaban nêrazîbîyayîşê xo mojna. Horbachî vat: "Ganî no arşîv apey bêro dayene wayîranê ci ke merdimê zanyarî yê ke wazenê muzîkê kurdan ser o bixebitê tira îstîfade bikê." Horbachî îfade kerd ke eke Wezaretê Karanê Zereyî arşîv nêdano ganî seba rayaumûmîye eşkera biko ke çira nêdano. Horbachî vat: "Xora na rewşa rewşa astengkerdişê azadîya fikran a. Eke eserêk ame pêşkêşkerdene ganî hînî nêro astengkerdene. Ganî hînî her kes bieşko bireso ci. Na rewşe hetê qanûnan ra yena pawitene."

Kesê ke wazenê hetkarîye bikê eşkenê nê hesabî ser o paşt bidê kampanya;

Verein z. Förderung kurdischer Kultur e.V. i.Gr.

IBAN: DE78 4306 0967 1011 1214 00

Verwendungszweck: Edition Mezopotamya