Dewa Oleka Jorî ya Bedlîsî de Goristanê Xerzanî 19ê kanûna 2017î de makîneyanê karî texrîb kerdbi. Goristanî ra 282 cenazayê gerîlayan ameybî vetene û nê cenazayî mîyanê kutuyanê plastîkan de kişta rayîrî ya Goristanê Kîlyosî de ameybî binerdkerdene. Rixmê xîretan û nêrazîbîyayîşan de keyeyî bi serran nêeşkayî cenazayanê domananê xo bigêrê.

Cenazaya gerîla Nîzamettîn Gokalanî netîceya xîretanê keyeyê ci de 14ê kanûne de amebî teslîmkerdene. Keyeyê Gokalanî cenaza girewte û berde Amed.

Goristanê Yenîkoyî yê Rêzanî de seba cenaza merasîmêk ame kerdene. Sere de ferdê keyeyî îdarekarê MEBYA-DER, TUHAY-DER, MED-DER, HDP û alîmê dînî zî tewrê merasîmî bîyî. La polîsanê tirkan dekewtişê goristanî de girse asteng kerd û nêverda ke ferdanê keyeyî ra ber çew tewrê merasîmê definî bibo.

Keyeyî qezaya Peyazî de taxa Huzurevlerî de Keyeyê Şînî yê Erxenîyîjan de tezîye naye ro.

Avûkatan par menga gulane de seba cenazayanê kişta rayîrî muracatê Mehkemeya Heqanê Merdiman a Ewropa kerdbî. Mehkeme bire dabî ke heqê 'hûrmetê bi cuya taybete û keyeyî' ameyo binpaykerdene. Kîlyosî ra heta nika 20 cenazayî teslîmê keyeyan ameyî kerdene.