Huqûnas Mehmet Cevat Yilmazî derheqê heqê hêvîye, tecrîd û qeraranê Mehkemeya Heqanê Merdiman a Ewropa (MHME) de ANFyî rê qisey kerd.

Yilmazî ard ziwan ke pawitişê heqê hêvîye heqanê tepişteyan ê tewr girîngan ra yew o û vat: ''Goreyê Qanûnê Ceza yê Tirkan (TCK) cezaya tewr girane cezaya muebede ya. Na ceza qanûnê ceza yê verênî de asta îdamî de ya. La goreyê qanûnê înfazî, kesê ke cezaya mubede dîyaya nînan 30 serran ra dima eşkeno heqê hêvîye ra îstîfade bikerê. La goreyê hukmê 107/16î cezayê çarçewa 'sûcanê vera yewparetîya milî ya dewlete û destûrê bingeyînî' nêeşkenê heqê veradîyayîşê bi şertî ra îstîfade bikerê. Yanî kesanê ke sûcê winayênî kerdê, ê do nêeşkê veradîyayîşê bi şertî ra îstîfade bikerê. No zî beno sebeb ke nê kesî heta peynîya emrê xo tepişte bimanê.''

Yilmazî derheqê biranê MHME yê serê heqê hêvîye de vat: ''MHME qeraranê vera Îtalya û Brîtanya reyde îfade kerd ke zaf girîng o ke hêvîya tepişteyêkî est a ke zîndanî ra bivejîyo. MHME dîyar kena ke seba veradîyayîşî ganî mekanîzmayêke est ba. Ney reyde birê MHME yê vera Tirkîya zaf girîng ê. Bira destpêke derheqê Birêz Ocalanî de bîye û na bire derheqê şert û mercanê zîndanî yê Tirkîya de hişyarîyêka cidîye bîye. MHME pare kerdbi ke ganî hêvîya veradîyayîşî destî ra nêşoro.

Tirkîya hem biranê MHME nêana ca hem zî qanûnanê înfazî de noqtayê ke heqê hêvîye çin hesibnenê dewam kenê. Tirkîya qanûnanê înfazî de cîyakerîye verê tepişteyan de kena. Mîsal kesê ke kişîyayîşî ra tepişte yê eşkenê veradîyayîşê bi şertî ra îstîfade bikerê.''

Yilmazî bale ante tecrîdê vera Rayber Apoyî ser û vat: ''Tecrîd qetî vera huqûqî yo. Vera rûmetê merdimatîye yo. Tenaverdayîş û îzolasyon metodê tecrîdî yo giran o. Goreyê madeyanê MHME tecrîd binpaykerdişê qedexeyê vera îşkence û kerdişanê xiraban o. Ganî vera kerdişanê winayênan têkoşîn bêro kerdene. Sereraştkerdişî heqê hêvîye de ganî bi lezî bêrê kerdene. Ganî huqûq bi şertî nêro kerdene û ganî heqê hêvîye bêro caardene.''