Yuksekdage: Rojawan de zorbazîye û heqdarîye yewbînan de şer kenê

Yuksekdage: Beno ke xurt bê, la nê heqdar nîyê. Rojawan de zorbazîye û heqdarîye şerê yewbînan kenê. Îqtîdarê AKP’yî û lobîya şerî ya dormeyî kom bîyî, xîret kene xo bi zorî heqdar bimojnê, la nêeşkenê.

Hemsereka verene ya Pêroyî yê HDP’yî Fîgen Yuksekdaga  ke Zîndanê Kandira yê Tipê F’yî de tepişte ya, derheqê hêrişanê verba Vakur û Rojakewtena Sûrîye de qisey kerd.

Yuksekdage pare kerd ke polîtîkayê bingeyênî yê îqtîdarê sîyasî yê Tirkîya şer o û hêrişê îşxalkarîye yê verba Vakur û Rojakewtena Sûrîye zî na çarçewe de ya û va:'' Beno ke xurt bê, labelê na nêna a mene ke şima heqdar ê. Rojawan de zorbazîye û heqdarîye yewbînan de şer kene. Îqtîdarê qesre yê AKP’yî û lobîya şerî ya dormeyê ey kom bîyî, xîret kerd ke xo bi zorbazîye sey heqdar bimojnê labelê nêeşkenê nê bikê û do nêeşkê bikê. Her çiqas hêzo bêpeynî yê leşkeri û sîyasî aîdê înan bibê zî, wayîrê firsendê NATO yê bibê zî, hêzê emperyalîstî pêroyê firsendan pêşkêşê înan bikê zî, medya, partîyê mûxalefetî paşt bidê înan zî nêeşkenê xo sey meşrû bimojnê. Êyê ke ameyî kiştene û wareyê xora bîyî şarê Rojawanî û şarê Herême bîyî. Labelê eşkera yo ke îqtîdar pê nê şer ser nêkewt. Çunke heqdarîye û esbîyayîşê tarîxî bi top, tifing û bombayan nêna qezençkerdene. Heman deman de êyê ke verba  nê kenê, do rojêke qetî çin bibê. AKP û dormeyê ci eke wina dewam bikê bi hewayêkê tarîxî do çin bibê.  Polîtîkaya xirab a dewletî reyde zî pirdo tarîxî yê mabênê şaranê Kurd û Tirkî bi rayîrê têkoşînî û sîyaseto demokratik ame pawitene. Eke pirdo tarîxî yê mabênê Kurd û Tirkî bêro rijnayene, netîceyê ci do zaf giran bibê ke qet nêeşkenê bêrê vatene.''