10 tepişteyanê sîyasîyan ê ke Zîndanê Bunyanî yê Kayserî ra sewqê Zîndanê Akçadagî yê Meletî ameyî kerdene, wextê sewqî de îşkence dî. Nê tepişteyan ra Sedat Avciyî bi rayîrê telefonî keyeyê xo rê qala îşkenceyî kerde.

Avciyî îfade kerd ke eşkerayîya selahîyetdaran a ke vatêne 'Serê sînorê Sûrîye de 3 leşkerî ameyê kiştene' îşkenceyê vera înan zêdîya. Avciyî vat: ''Gardîyanan eşt koxûşan ser û ma rê îşkence kerd.'' Tepişteyanê sîyasîyan venga rayaumûmîya demokratîke da ke bala xo bida babete ser.

Zîndanê Cinîyan ê Kayserî de zî berdişê nêweşxaneyî de tedaya girane tepişteyan rê yena krdene. Cinîyan îfade kerd ke eke na rewşe dewam bikera ê do tedawî red bikerê.