Vedat Duyuşo ke rîyê têrorê dewlete yê vera Nisêbînê Mêrdînî yê 2016 ra semedê xebate şi Antalya, uca tepişya bîlasebeb cezaya muebedê giranî dîyaye ci, da zanayene ke înan rê îşkence yeno kerdene. Duyuşî bi rayîrê telefonî keyeyî xo rê qala binpaykerdişê heqanî kerd û veng da Komeleya Heqanê Merdiman (ÎHD).

Waya Duyuşî Xunafe Duyîşî vat rewşa birayê ci hole nîya û vat: ''Heqê telefonî yê 20 deqeyan bi keyfî kerdo 5 deqeyî. Ma ta nêmayî vajê hewceyê ey çîyêkî est o, çîn o.''

Vedat Duyîşî telefon de vat: ''Mektubî û kargoyî nêdîyenê ma. Ma binê zextê de yê, raştê heqeratî yenê. Heme heqê ma yenê binpaykerdene. Gama ke ma vejîyenê cayê hewagirewtişî ma ser o berî qefilnenê. Ma panc saetî binê varayîşê vewre û şilî de manenê.''

Xunafe Duyuşî da zanayene ke sîyasîyê tepişteyî îHDyî ra cipersayîşê zîndanî wazenê û vat eke problemî merê çareserkerdene ê do dest pê grevê vêşanîye bikerê.

Dayîka Duyuşî Fatma Duyuş zî hêrs û dejê xo ard ziwan û vat: ''Ê domananê ma ra çi wazenê, xora esîr girewtî înan çi qedayê xo dayo domananê ma. Hinî bes o, wa îdestê xo înan ser o biancê.''