Zîndanê Aksarayî de tepişteyê bi nameyê Bişar Bilen, Muhammed Fatih Bingol û Umut Dereyî dest pê grevê vêşanîye yê bêdem-bêagêrayîşî kerdbi. Roja 9. a çalakî de vizêr Bahattîn Çelebî û Îhsan Taşdelenî zî tewrê çalakî bîyî.

Xoverdayoxanê zîndanî ra Bişar Bilenî  ke keyeyê xo dir bi telefonî qisey kerd vat vera înan tehdît û şantajî dewam kenê. Bilenî da pêhesnayene ke 5 kesê ke grev de yê hucrayanê yewkesan de yenê tepiştene û têna roje de saetêke vejîyenê cayê hewagirewtişî. Bilenî ard ziwan ke rixmo ke ê yenê derbkerdene doktorê zîndanî rapor înan nêdano. Reyna rixmo ke grevê vêşanîye de werdî anê verê hucreyanê înan de bi saetan verdenê û vat heme heqê ma yê bingeyênî yenê binpaykerdene. Bilenî ard ziwan ke gardîyanî zî bi keyfî nizdîye înan benê û waşt ke heyetêk şirê zîndan.

Hetê bînî ra TUHAY-DERî da zanayene ke Zîndanê Osmanîye de heqê tepişteyan yenê binpaykerdene û nêweşî mergî rê ameyî caverdayene.