Tepişteyê dewaya PKK û PAJKî seba çareserîya meseleya kurdan û azadîya Rayberê Şarê Kurdî Abdullah Ocalanî 100 rojî yo grevê vêşanîye de yê.

Zîndanê Kavakî yê Samsunî de zî tepişteyî grevê vêşanîye de yê. Tepişteyan ra Vedat Hesasî bi telefonî keyeyê xo de qisey kerd û qalê îşkenceyî kerd. 

Hesasî telefon de keyeyê xo rê nê agahîyî dayî: ''Seba ke wextê hûmaritişî de embazê ma payan ser de nêvindertî gardîyanan hêrişê înan kerd û îşkence kerd. Embazanê ma rê cigêrayîşo rût ame ferzkerdene la seba ke embazan no qebul nêkerd ancî ê raştê hêrişî ameyî. Embazanê ma yê grevî bi pereyê xo awa meyweyan, semawer û televîzyon hêrînabî la nê çîyî nêdîyenê ma. 

Ma derheqê îşkenceyî de waştişnameyî şawitbî hakîmîya înfazî û dozgerîye la ma rê nêame vatene ke waştişnameyê ma resayê destê înan yan ney. Eke waştişnameyî resayê destê înan o çax demêg ê paştî danê nê îşkenceyan. Tîya de sey verg û cergan hêrişê ma kenê. Ma rê bi qiseyanê 'Nê rojê şima yê weş ê. Hema şima do çi bivînê' gefî yenê wendene. Ma wazenê wa vengê ma bieşnawîyo. Ganî komeleyê heqanê merdiman, rêxistinê komelê sivîlî, partîyê sîyasîyî û wekîlî derheqê nê binpaykerdişan de heyetêkî bişawê zîndanî.''