Vervatoxa DEM Partî Ayşegule Dogan kombîyayîşê çapemenîye kerd.

Ayşegule Sirri Sureyya Onder yad kerd û bale ante xîretê suîkastî ser. Auşegule vat: ‘’Lastîkê wesayîtê ey de dafikêke ronîyaya ke do bieşkayêne bi wesayîtî qeza bida kerdene. Seba ke babete hesas bîye ma rayaumûmîye de pare nêkerde la tedbîrê hewceyî girewtîbî.

Xora Onderî zî nê prosesî de nêwaştibi ke na babete bêra îstîsmarkerdene. Ma nêwaşt ke komel bi qesawetî bikewo.

Endama Heyetê Îmraliyî Pervîne Buldan zî Roma de qezayê trafîkî derbaz kerdibî. Tayê îdîa kenê ke no zî suîkastêk bîyo la wina nîyo. Serebût tena qezayêkê trafîkî bi.’’

Ayşegule persê rojnamegeran ser o vat: ‘’ Partîya Karkeran a Kurdîstanî (PKK) do îlan bikera ke kongre arê daya. Ma nê îlanê tarîxîyî hê pawenê. Her kes ganî bi mesuldarî têbigêro. Prosesê peyê ney zî zaf girîng o.’’