Eylaletê Minnesota yê DYA de dima ke afro-amerîkanijê bi nameyê Geroge Floyd hetê polîsan ra ame kiştene, serebûtê ke dest pêkerd, dewam kenê. Rixmê qedexeyê tebervejîyayîşî zî sere de Minnesota de temamîya welatî de zaf nawnayîşî ameyî serûberkerdene. Seba ke verê nawnayîşan bêro girewtene 500 leşkerê Muhafizanê Neteweyîyan erşawîyayî herême, labelê ê zî nêeşkîyayî verê nawnayîşan bigêrê.

Paytextê Minnesota yê Minnapolisî, şaristananê Dallas, NewYork, Houstun, Las Vegas, Atlanta û Portlandî yê eyalatanê bînan de zî bi hezarankesî tewrê nawnayîşan benê. Xeylêk şaristanan de wextê çalakîyan de pêkewtiş qewimîya. Polîsan pê bombayan gaz û dûyî xîret kerd ke verê nawnayîşan bigêrê. Sere de Minneapolis de xeylêk şaristanan de bînayî ameyî vêşnayene û xerakerdene.

Serekê DYA Donald Trumpî îdîa kerdbi ke seba sewqîyatê polîsanê leşkerîyan ferman da Wezaretê Pawitişî. Na îdîa rojnameyê NewYork Times de ameye parekerdene. Labelê hetê bînî ra rojnameyî da zanayene ke Walîyê Minnesota Tim Valzî îfade kerd ke înan sewqîyatê polîsan ê leşkerîyan qebul nêkerd. Yeno vatene ke Valz herinda naye de qerar da ke pê hezaran Muhafizanê Neteweyîyan bivisno dewre. Muhafizê Neteweyî yewinêka hempare ya hêzanê erd û hewayî ya DYA yê ke 'seba serebûtanê komelkîyan ê zereyî' û vera afetanê xoza awan bîyî.

Valzî şewa şemeyî îdîa kerdbi ke serebûtê giranêrî beno ke do biqewimê. Serebûtan de xeylêk kesî ameyî destbendkerdene. Çend rojî verê cû eşkera bibi ke tay rojnamegerî zî bîyî hedefê nêzdîbîyayîşan ê xiraban û ameyî destbendkerdene.