5ê çeleyê 2020î ra nata wendekara Zanîngehê Munzurî Gulîstane Doku ra xeberêke nêna girewtene. Gulîstana 21 serre 464 rojî yo vînîbîyaye ya.

Her çiqas Serdozgerîya Komare ya Dêrsimî derheqê serebûtî de tehqîqatêk dabi destpêkerdene zî îfadeyo hîra yê vergumanê yewinî Zaynal Abarakovî qet nêame girewtene. Dêrsim de roje 24 saetan pê kamerayan yeno teqîbkerdene rêçêkê Gulîstane nêdîya. Rêxistinê cinîyan û keyeyê Fokuyî wazenê wa xebatê zêdeyî bêrê kerdene û sûcdarê serebûtî bêrê cezakerdene.

Serdozgerîye qestî ra îxtîmalê 'xokiştişî' ser o vindert. Dima ke Pirdê Dînarî de kamerayan ra dîmenê cinîyêke dîyayî ame vatene ke Gulîstane xo eşta Awbendê Uzunçayirî. 7ê çeleyî de awbend de cigêrayîşî ameyî kerdene la 6ê temmuze de cigêrayîşî vindertî û 7ê tebaxe de newe ra dest pêkerd. No cigêrayîş zî 18ê tebaxe de qedîya. 15ê teşrîna verêne de reya 3. cigêrayîş dest pêkerd la ancî netîceyêke nêameye destvistene. 23ê teşrîna peyêne de bi temamî xebatê cigêrayîşî qedîyayî.