Ambargoyê serê Kampa Koçberan a Şehîd Rustem Cûdî ya Mexmûrî nizdê di mengan o dewam keno. Çalakîya roniştişî ya Dayîkanê Haştîye yê Mexmûrî ya ke semede wedartişê ambargoyî yena viraştene, kewte roja 5’ine.

Dayîkê ke şewe bi deyîranê şorişgêrî yê Botanî çalakîye xo domnenê ard ziwan ke înan dem û hêrişê hîna zehmetî dîyî û ê do ambargo zî bi xoverdayîş xo dima biverdî. Dayîkan vat heta wedartişê ambargoyî ê do çalakîya xo rê dewam bikerê.

1’ê Êlule de Dayîkanê Haştîye yê Mexmûrî ra grûbêk waşt ke vera ambargoyî şirê Hewlêr û îdarekaranê Asayîşê Hewlêrî dir pêvînayîş viraze. La dayîkî dekewtişê bajarî de hetê hêzanê asayîşî ra ameybî vindarnayene û raştê hêrişî ameybî. Dayîkan naye ser ra çalakya roniştişî dayebî destpêkerdene.