Hêrişê îşxalî yê dewleta tirke û çeteyanê ci yê vera Awbendê Tişrînî û Pirdê Qereqozaxî 8ê kanûna 2024î ra nata dewam kenê. Vera nê hêrişan şarê Rojawanî 8ê çeleyî de Awbendê Tişrînî de çalakîya nobete daye destpêkerdene. Rixmê hêrişanê giranan ê vera sîvîlan ke xeylê kesî şehîd bîyî û bi desan kesî birîndar bîyî şar bi hewayêkê qerardarî çalakîya xo domneno.

Çalakwananê Awbendê Tişrînî ke ANFyî rê qisey kerd, vat ê do rixmê heme hêrişanê dewleta tirke xoverdayîşê xo bidomnê.

Şerzate Mihemed ard ziwan ke ê do çirey xoverdayîşî cameverdê û nê vatî: ''Ma ewro tîya herra xo pawenê. Ez sey ciwanêkê kobanêyijî vana ke se beno wa bibo ma do çirey xoverdayîşî cameverdê. Ya ma na herre de azad ciwîyenê ya zî ma heta ke bibê şehîd  xover danê.''

Hemwelatîye bi nameyê Doganî zî wina qisey kerd: ''Goreyê heme qanûnanê dinya hedefgirewtişê awbendan sûc o. La dewleta tirke tim awbendê ma hedef gena. Pê teyaranê şerî hêriş kenê. Eke ewro no awbend birijîyo bi desan warê ronişitişî binê awe de manenê. Qet çew nê nêvîneno?''

Edlê Rom zî wina vat: ''Awbendê Tişrînî bi gonîya bi hezaran ciwananê kurdan bi azad. Dewleta tirke bi nê hêrişan nêeşkena îradeyê şarî kurdî bişino. Ma do rixmê heme hêrişan xover bidê.''

Mihemed Eli Şêxî zî nê vatî: ''Bi hewteyan o na herre de xoverdayîşo gird est o. Dewleta tirke bi rojan o şarî dana bombayan ver, qirkerdişan kena. La wa no hole bêro zanayene ke na herre û Awbendê Tişrînî bi gonîya ma bîyî azad. Ma do çirey desturê îşxalê dewleta tirke medê.''

Ezedîn Şêxî zî wina vat: ''Verê çimanê heme dinya de dewleta tirke vera kurdan şerê qirkerdişî kena. Erdoganî eşkera vat o do kurdan pîya bi destketeyanê înan çîn bikero. No şer têna vera kurdan nîyo, heme şarê herême yenê hedefgirewtene.  Coka ma ewro tîya sey şaranê Rojawanî vera hêrişan xover danê.''