Hemsereka DBPyî ya Amedî Sultane Yaray derheqê pêvînayîşanê bi Rayber Apoyî de ANFyî rê qisey kerd. 

Sultane Yaray îfade kerd ke şarê kurdî hinî azadîya Rayber Apoyî wazeno û vat: ''Tecrîdê vera Birêz Ocalanî tim dewam kerdêne. Tecrîd qetî nêqedîya. Dewlete naye baş zanena ke Birêz Ocalan tena şexsêk nîyo, lîderê şarêkî yo. Yanî lîderê bi mîlyonan merdiman yeno tecrîdkerdene. Şexsê Birêz Ocalanî de yeno waştene ke vengê şarê kurdî bêro birnayene. 

Şarê kurdî hinî azadîya Ocalanî wazeno. Eke îqtîdar ney bikero do atmosferêkê bawerîye do bêro afernayene. Muxatabê haştîye Birêz Ocalan o. Eke huqûq bêro caardene û tecrîd biqedo no do bibo çimeyêkê moral û motîvasyonî. Hem tecrîd hem hêrişê vera Rojawanî dewam kenê. Caardişê azadîya Birêz Ocalanî do seba haştîye bibo gamêka girînge. Eke pêvînayîşan ra seba haştîye netîceyêke yena waştene ganî hêrişê vera kurdan biqedê. Heta ke tecrîd nêqedo merdim nêeşkeno qalê haştîye bikero.

Adresê haştî û çareserîye Birêz Ocalan o. Pêvînayîşî ganî bi baldarî bêrê kerdene. Ganî îqtîdarê AKP-MHPyî ziwanê dişmenîye ra fek vera bido. Birêz Ocalan rixmê tecrîdî zî seba haştîyêka rûmetêne têkoşîn keno. Ganî bingeyê way û biratîye de çareserîye bêra caardene.''