Fermandara Qerargehê Merkezî yê YJA-Starî Zozane Çewlike cewab da perdanê Stêrk TVyî. Qiseykerdişê Çewlike ra me qismêk pare kenê.

Zozane Çewlik vat: ''No şerê îşxalî çîyo newe nîyo. No konseptê îşxalkerdişê herra Kurdîstanî yo. Têgêrayîşê Azadîye yê Kurdan semedê kurdan, cinîyan û heme şaranê bindestan têkoşîn keno. Hêrişê qirkerdişî yê vera Rayberîye, şar û têgêrayîşê ma zî pabesteyê nê konseptê şerî yê. Wazenê ke verê xeta azadîye ya ke Rayberîye semedê şaran û bindestan afernaya bigêrê.  Zaf hêzî est ê ke xeta azadîye ya Rayberîye semedê xo sey tehluke vînenî. Coka mîyanê konseptê şerî yê vera ma de ca genê. Sereyê nê hêzan de NATO est o. Dewleta tirke pê paştdayîşê NATOyî sîyasetê qirkerdişî vera Rayberîye û şarê kurdî rayra bena. Wazenê şexsê Rayber Apoyî de kurdan werte ra wedarê. Bêşik nê hêrişî têna vera PKKyî nîyê. Planê îşxalê dergî ameyî kerdene. Coka ganî şarê kurdî û her kes waştişê nê konseptî hole fam bikero.

Emser semedê îqtîdarê AKP-MHPyî serrêka krîtîk a. Reyna semedê PDKyî zî serrêka krîtîk a. Xoverdayîşê kurdan îqtîdar kerd zehîf.  Îqtîdaro faşîst wexto tewr tengî de yo. Coka NATO, hêzanê mîyanneteweyî û PDKyî geno cayê xo. Rayberîye, gerîla û raştîya PKKyî semedê nê hêzan tehlukeyo pîl o. Seba ke menfeatê înan yew ê tay hêzî konseptê îşxalî yê dewleta tirke de aktîf ca genê û hêrişan rê çimanê xo genê. No şerê Erdoganî yo. Hinî nêeşkenê şarî bixapînê. Destê înan de têna konspetê şerî mendo. Erdogan seba ke vîn mekero heme îmkananê dewlete û PDKyî şuxulneno. Eslê xo de PDK zî dewleta tirke şuxulneno. PDK zî zano ke peynîya ci ameya.

Seba ke PDK konseptê şerî de ca megêro têgêrayîş û şarê ma çîyo ke destê ci ra ame kerd la PDKyî semedê îşxalkerdişê Herêmanê Pawitişî yê Medya gamêke aver eşte. Cunke nê hêrişî ra menfeatê ci est o. Hêzê îqtîdarî, dewletê îşxalkerî û PDK yewîya neteweyîye ya kurdan nêwezenê. Şarê kurdî xeymê PDKyî de nîyo, têna goreyê menfeatanê xo têgêreno. AKP wazeno ke PKKyî îmha bikero û dima ra Başûr û Rojawanî îşxal bikero. Waştişê ci yo bînî zî girewtişê Kerkuk û Mûsûlî yo.  PDK her hetî ra paştî dano dewleta tirke. Ma zanê ke leşkerê tirkan pê kincanê pêşmergeyan şer kenê. PDK seba nêrazîbîyayîşê zêd mebê tay çîyan mîyan keno.

PDK wazeno ke Zap û Avaşîn wa bêrê wardayene û plan keno ke dima ra hêzanê xo warê Behdînan de  bikero aktîf. Başûr de eşîranê ke bedelê bîlî dayî û wayîrê ercanê xo vejîyê PDK tewr zaf vera înan polîtîkayanê cîyayayn ano ca.  Şarê Başûrî bitaybetî şarê Behdînanî ganî na raştîye bivîno. Xeta cerêne ra dormeyê Zapî ameyo girewtene ke no bi destê PDKyî beno. Masrûr Barzanî bi xo nê organîze keno. PDK wa nê hole bizan; Eke gerîlayê Kurdîstanî Zap de tengayî biancê ma zî do Barzanî bigêrê! Newroze de ciwananê ke vatêne ‘Bijî Serok Apo’  ê Zapî têna verdenê? PDK wa nê sîyasetî caverdo.

Gerîlaynê Kurdîstanî xo zimistanî ra amade kerdbi. Xora ma pawêtene. Newroze de her kesî vindertişê gerîlayan dî. Bitaybetî şerê parî yê Herêmanê Pawitişî yê Medya de tecrubeyêko pîl vejîya werte. O şerî de dewleta tirke heme metodê leyminî şuxulnayî. Par dişmenî xeylêk cayan de leşkerê xo ca kerdî û cayê ke tede gerîlayî çinê bî girewtî. Nika xeylêk cayan de şer o giran est o. Zap de şewe roje şer est o. Çîyayê Reş, Kurêjahro û Şehîd Berxwedan de çeka kimyewîye şuxulnaye. Şer têna tunelan de nîyo, erazî de çalakîyî dahîna zaf ê. Gerîlayî têna xover nêdanê, semedê serekwtişî çalakîyan zî kenê. Gerîlayê Zapî bitecrube yê. Ma Zapî têna Zap de nê pawenê, heme gerîlayê Herêmanê Pawitişî yê Medya do Zapî bipawê.

Gerîlayê YJA Starî serkêşîya nê şerî kenê. Heta nika 8 gerîlayê cinîyî şehîd bîyî. Ez şexsê Mizgine, Vîyane û Şaristane de heme embazanê şehîdan bi hurmetî yad kena. Ma eşkenê vajê ke YJA Star rengê xo dano şerî. Ez bi nameyê Rayraberdişê YJA Starî serkêkîye û çalakîyanê  înan selam kena. Seba ke cinîya kurde bîya hêz dewleta tirke tira qehryena. Ma sey gerîlayanê HPG û YJA Starî planêk kerd. Ma do pawitiş de memanê. Vera ma hêrişê xurtî yenê kerdene. Zap û Avaşîn de şero germin qewimîyeno û ganî ma nê açarnê serkewtişî. Ganî ma derbanê xurtan bidê piro. Ganî ma her ca de rolê xo aktîf kay bikerê. Xeylêk operasyonê dewleta tirke yê ke zimistanî ra nata dewam kenê ameyî betalkerdene. Dişmen vano ma gerîlayê Vakûrê Kurdîstanî qedînayî. Eke qedîyayî  şima qey hend operasyonan kenê? Ma zanê ça de çend gerîlayê ma est ê. Badê menga gulane gerîlayê Vakurê Kurdîstanî do pê çalakîyan hêzê xo ramojnê.

Şarê ma zî pê wayîrvejîyayîşê xoverdayîşê gerîlayan ganî berpisîyarîya xo bîyaro ca.  Xora Newroze û 8ê adare de şarê ma tewirê xo ramojna. Şarê ma yo ke waran canêverdeno ez bi anmeyê embazanê ma yê gerîlayan înan selam kena. Ez pê bawer a ke têkoşînê şarê ma ma biresno serkewtişî. No proses semedê kurdan muhîm o. Şarê ma do bi ruhê Newroze do gerîlayan têna meverdo û wayîrê îradeyê xo vejîyo. Senî ke gerîlayî semedê şarî ganê xo danê ganî şar zî wayîrê gerîlayan vejîyo. Semedê binfînayîşê faşîzmê AKP-MHPyî ma do heme waran bikerê waranê têkoşîn û serkwetişî.''